samedi 10 juillet 2010

Rémi Venture : la Crous de Prouvènço ???

.




Croix de Toulouse, croix de Provence, croix du Languedoc, Remi Venture nous donne sa vision des choses & étaie son raisonnement historique sur d'autres recherches passées, mais surtout des constatations de terrain! Cette polémique n'est pas prête de s'arrêter d'autant la politique s'en mele en reprenant ce symbole à son compte ???? Néanmoins je joints quelques photos "italienne" de la fameuse croix - il me manque la meilleur celle de l'Hôpital de Siène, qui rajouterait à la confusion!!!


0+0+0+0+0+0+0


1) Certo, la crous de Toulouso es seguramen d'ourigino prouvençalo (cf l'article d'H Rolland dins lou N° 1 de Provence Historique pareigu en 1950). Mai es pas di que la crous que pourtè seguramen Guihèn lou Liberatour èro deja la "croix vidée pommé et cléchée" talo la vesèn vuei... Maugrat ço que n'en dison lis oucitan, lis ensigne eraldico daton que de la mita dou siecle XIIen, e i'a ges de crous oucitano sus li cros de Guihèn lou Liberatour - qu'es esta perdu - o de soun sucessour Jaufre - qu'es adourna pèr uno simplo crous d'estile carlin...

2) Es poussible - pèr iéu proubable !...- que Ramoun de Toulouso chausiguè soun insigne en musclant la crous de soun rèire ouncle Guihèn lou Liberatour - mai n'en tiravo pas en drecho ligne au countràri de si cousin Prouvençau...- em'uno crous que veguè dins lou Levant...

3) Es pièi pèr justamen ana contro lis eiretié di Bousounide, qu'avien marida sa chato, Douço, emé lou Comte de Barcilouno, que li comte de Toulouso prenguèron aquelo crous, d'ourigino prouvençalo, pèr afierma si pretencioun dins l'escasènço - deja !...- d'aneissa Prouvènço à ço qu'aurié pouscu deveni uno meno de "Grando Oucitanio" - sènso aqueste noum de vincu, bord que fuguè baia pèr li Franchimand... S'agissié, lou rediren, d'uno vertadiero poulitico de proupagando...

4) Pèr rebeca, l'eraldisto francés Michel Pastoureau a bèn moustra que li Catalan se chausiguèron uno autro bandiero prouvençalo, mai auto e mai prestigiouso, aquelo dou reiaume de Prouvènço-Bourgougno - o Reiaume d'Arle. E l'aduguèron pièi de l'autre coustat di Pirenèu... Es prouva que la famouso legèndo di det dins lou sang marcant l'ecu de Jaufre lou Pelous dato que de mai tard, que fuguè creado pèr "catalanisa" aquel insigne !...

5) En 1132, li comte de Toulouso aguènt reçaupu dins un partage li "marcho" de Prouvènço - l'atualo Coumtat -, es nourmau que s'atrove de crous toulousano dins aqueste cantoun !... Li Comte de Fourcauquié, de soun coustat, èron liga i comte de Toulouso, subre-tout pèr ana contro li Catalan... Ero parié pèr li sire di Baus o li Vicomte de Marsiho... Vaqui perqué prenguèron la crous de si champioun !... Sèmpre pèr ana contro la bandiero sang e or de sis enemis...

6) Mai i'a quand mume, en Prouvènço, forço, forço mai de blasoun pourtant lou "sang e or" e, mume, li flourdalis anjouvino que de crous toulousano !...


Pèr counclure, dirai ço que vaqui:

- A l'epoco, lis insigne èron, es vurai, de vertadié "logo" pouliti... Lou Comte de Toulouso faguè un pau coume Audouard III d'Anglo-Terro que, à la debuto de la guerro de 100 an, metiguè en avans li flourdalis franceso contro lou lioun anglés, pèr bèn dire si pretencioun sis la courouno de Franço... Mai aco se faguè bèn mai tard, dins un tèms que lis insigne dinasti èron bèn marca e bèn defeni...ço qu'èro pancaro lou cas dins lou tèms que n'en parlan... Se la crous toulousano pou agué uno ourigino prouvençalo liuenchenco, aco empacho pas que vuei, es bèn Lengadouciano o "Oucitano". S'es marcado sus lou caladat de la Plaço dou Capitoli de Toulouso, o sus li logo d'aquelo vilo e de sa Regioun, es pas pèr ço que la crous en questioun es "Provençala"... Es de-bon, e soulamen, Lengadouciano - o Oucitano...- despièi lou siecle XIIen !...

- Co que comte dins la valour simboulico e identitàri d'un insigne, es pas soun istori. Es ço qu'es pièi devengu. Lou drapèu Corso vèn d'Aragoun. Aquéu di basco es coupia sus l'anglés... La bandiero espagnolo tiro dou drapèu catalan, qu'éu mume, l'avèn vist, vèn dou Reiaume de Prouvènço-Bourgougno. Quant à la bandiero franceso, lou mume Miquéu Pastoureau que n'en parlère adès a bèn moustra que venié di coulour... americano !... Qu'enchau tout aco ?...

- Darriero causo, pèr feni. Coume à l'epoco di comte catalan, la crous de Toulouso es vuei lou simbole d'aquéli que volon aneissa Prouvènço à l'autro man dou Rose... Lou Sang e Or es lou di Prouvençau que volon resta ço que soun... Li fiéu d'uno di mai gràndi regioun identitàri de Franço, que refusaran sèmpre de se vèire muscla dins lou melting pot panoucitan abandeira emé la messourguiero "crotz provençala" qu'es, aqui, qu'un outis d'aquelo marrido poulitico....


.

Aucun commentaire: