Un artisto Marsihés
Ounourat Daumier
Ounourat Daumier
Ounourat, Doumenge Daumier neissiguè lou 26 de febrié de 1808. Countempouran de Vitour Gelu, èro d’uno famiho poupulàri que tiravo de Beziés. Soun paire, un veirié-encadraire, èro un ome letru e republican que se diguè de mounta à Paris pèr faire dins la literaturo e la pouësìo. Partiguè en 1816 e dous an plus tard faguè mounta la famiho. Daumier quitè dounc nosto vilo qu’avié dès an. Rèsto pamens un grand Marsihés que fai ounour à sa vilo. Dison que perdeguè l’acènt mai que perdeguè jamai lou soulèu d’en dedins !
_______L’artisto
Coumencè de dessina pichot, mai ié fauguè travaia proumié encò d’un ussié pièi d’un libràri enfin encò d’un estampaire de litougrafìo. Estudiè lou dessin, trevè lou Louvre e mai que mai, Rubens, Titien, Rembrandt, lis esculturo antico e faguè de còpi di grand mèstre. Publiquè pièi dins « La Silouhette » tre 1828, « La Caricature », « Le Charivari », « L’Association mensuelle lithographique ». Si proumié dessin toucavon lou mounde parlamentàri. Anavo à la Chambro sènso rèn nouta ni dessina. Fasié que de regarda. Pièi, rintra, moudelavo de buste de terro avans de passa au dessin pèr la litougrafìo. Lis óuriginau en terro, forço acoulouri, soun aro au Museon d’Orsay à Paris. N’en tirè pièi de buste de brounze.
En 1832, fuguè encarcera sièis mes de tèms à la presoun Santo Pelagìo pièi encò di fòu, pèr la caricaturo litougrafico qu’avié facho, un an plus lèu, dóu rèi Louis-Felip en “Gargantua” emé si menistre en marmitoun que ié fasien empassa de tausso à bóudre. Daumier troubavo lou rèi, trop gros manjaire de sòu… Mai tout lou mounde ié passavo : lou rèi, sa famiho, si menistre, si generau, sènso óublida li magistra e àutri crespina !…
Emé Daumier, l’art devenguè vióulènt, la caricaturo fèro. Jamai s’èro dessina emé tant de prouvoucacioun subre-tout que li dessin avien tóuti sa legèndo de Carle Philipon, legèndo di mai prouvoucatriço, elo tambèn. Autambèn, Daumier fuguè lèu adóuta pèr li republican. Avié ges de pieta pèr la leidour e subre-tout pèr la graisso que se devinavo signe de richesso, mai li maigre fasien tambèn sa joio !
Daumier èro republican e republican engaja que participè à la revoulucioun de 1830 e aparè sènso relàmbi la liberta d’espressioun e lou pichot pople. Quàuqui persounage aguèron si favour. Pèr eisèmple Thiers que se comto plus li carituro que Daumier n’en faguè entre 1832 e 1852. Thiers risoulet, Thiers finot, Thiers en Poulichinel e sèmpre li legèndo enverinado de Philipon. Aute eisèmple, lis ensignaire de l’Escolo dis bèus-artque soun vertadieramen assassina, etc. !
S’es souvènt parla de Goya raport à Daumier. E verai que i’a de poun coumun emé l’emoucioun e lou dramati d’ùni de si coumpousicioun. Avié d’aiours pres Goya e Rubens coume mèstre quouro jouine.
______L’obro
L’obro de Daumier es uno vertadiero recoustitucioun de la vido au tèms de Louis-Felip. De 1830 à 1852, nous baiè un panourama requist de touto la bourgesié, uno meno de journau ilustra de tout ço que lou touquè e lou marquè, dins la poulitico coume dins la vido vidanto. Uno pinturo dóu nescige uman. Quàuqui titre dounon uno idèio de ço que poudié èstre aquelo vióulènço : Les Divorceuses, les Femmes socialistes, les Bals de la cour, la Pèche aux actionnaires, les Philantropes du jour, le Ventre législatif…
Passado la revoulucioun de 1848, Daumier s’èro pensa de leissa la caricaturo. Patissié de la censuro en seguido de la lèi contro la liberta de la presso de 1831 que i’enebissié quàsi tóuti li sujèt interessant. Mai pièi, se desbarrassè d’aquélis empache e se dounè tout entié à la caricaturo de la soucieta bourgeso dóu siècle XIX emé de sceno parlamentàri, li gènt de justiço, li bourgés, etc.
La Poulitico, la Magistraturo, li Bourgés, la Prouvinço, li Roubert Macàri, li Bas Blu, lis Enfant, Paris, lis Invencioun, li Vacanço, lou Tiatre, lis Artisto. Se poudèn pas estudia l’istòri dóu siècle XIX sènso passa pèr la « Comédie humaine » de Balzac, se poudèn pas espargna nimai l’obro de Daumier.
Artisto aboundous, nous laisso de tiero tematico d’obro espetaclouso. Souvènt trouban lou meme sujèt trata e tourna trata plusiour cop. Ansin, se trevas lis avoucat, vous sias de segur regaudi en vesènt li caricaturo noumbrouso e sèmpre encapado que n’en faguè.
_____________Pintre e escultour
Mai proun di caricaturo dins li journau, e dis ilustracioun d’oubrage coume “Don Quichote”, Daumier fasié tambèn de caricaturo en pinturo. Souvènt retrouban li mémi sujèt trata di dous biais (pèr eisèmple lis avoucat). Mai li pinturo de Daumier, subre-tout après 1848, es tambèn d’obro coume sa « Marìo-Madaleno » o « Le Wagon de troisième classe » de 1864 que denouncio la paureta ; de pinturo que vous laisson bouco badanto.
Daumier espausè au Saloun. D’aiours, de grands artisto de tóuti li tèms, coume Van Gogh, Picasso, Toulouso-Lautrec, li pintre de Barbizon, Giacometti estimèron forço lou pintre e l’escultour pèr soun óuriginaleta e sa liberta de biais, nouvello dins soun tèms. Si grands ami : Delacroix, Courbet, Balzac, Baudelaire.
Emé, aperaqui 1.000 gravaduro e 4.000 litougrafìo entre 1830 e 1835, Daumier fuguè tambèn un escultour d’elèi e citaren que sa caricaturo escultado en 1833, de Carle Philipon, lou journalisto e direitour de « La Caricaturo » e dóu « Charivari » e la famouso estatueto de « Ratapoil » (1850).
Restè pamens paure touto sa vido e se deguè retira, en 1865, à Valmondois mounte Corot ié leissè un oustau siéu : « mon vieux camarade, lui écrivait-il, j'avais à Valmandois, près de l'Isle-Adam, une maisonnette dont je ne sais que faire. Il m'est venu à l'idée de te l'offrir et comme j'ai trouvé l'idée bonne, je suis allé la faire enregistrer chez le notaire. ce n'est pas pour toi que je fais cela, c'est pour embêter ton propriétaire. A toi ». Provo d’uno amista pleno de delicatesso.
Malurousamen, à forço de travaia à la candello coumencè de perdre la visto en 1872 pièi devenguè avugle. Mouriguè l’an d’après, en 1879, qu’avié 71 an. Grand artisto poupulàri, fuguè souvènt juja coume revouluciounàri mai que coume artisto, reflèisse pèr se revenja de si caricaturo. Avié pamens leissa la critico poulitico pèr la critico dis us de la soucieta en generau,
Ounourat Daumier, s’es un dis artisto francés li mai famihé de tóuti, rèsto pamens un di mens couneigu. Lou mounde, en generau, a vist si caricaturo mai sabon gaire dóu pintre e de l’escultour. Acò pèr la Franço ounte lou coustat pouliti di caricaturo faguè flòri. A l’estrangié es tout lou countràri e Daumier i’es subre-tout couneigu e presa coume pintre e escultour. Si pinturo (mai de 300), sèmblo que soun de vuei talamen soun d’atualita e mouderno dins soun biais. Fuguè un visiounàri e s’es meme di qu’èro un di foundatour de « l’art mouderne », un precursour dis impressiounisto e di fauve.
Trouban sis obro dins li mai grand museon coume lou Museon dóu Louvre o lou Museon d’Orsay de Paris, lou Metropolitan Museum de New-York, lou Museon dis Art de Filadelfìo, aquéu de Glasgow, de Prago o lou Museon di bèus-art de l’Universita dóu Montana (mai de 100 obro), e de pertout dins lou mounde. Empacho pas que de soun tèms fuguè ignoura dóu grand publi e faguè jamai flòri.
Daumier rèsto vuei uno di glòri de la Franço. Marsiho óublido pas qu’es siéu!
Peireto Berengier
Bibliougrafìo :
« Grand Dictionnaire universel du XIX siècle ».
« Arts et livres de Provence ».
Aucun commentaire:
Enregistrer un commentaire