Founda en 1946 pèr Pèire Julian, majourau dóu Felibrige e Presidènt dóu Coumitat dóu Museon Arlaten emé li dre d’autour dóu Pouèto, lou Pres Frederi-Mistral de literaturo prouvençalo se baio despièi sa creacioun lou prefa l’ilustra la lengo e l’ourtougràfi di cap d’obro mistralen. Es que i’a, e ço despièi de siecle, uno lengo que si loucutour i’an sèmpre mes qu’aquéu bèu noum de Prouvençalo. E pièi uno literaturo que, de Bellaud de la Belaudiero fin qu’à vuei, s’es sèmpre noumado emé fierta que prouvençalo… Despièi 1946, lou Pres Frederi Mistral courounè la quàsi toutalita di grand noum de nosto literaturo.
Vuei, la jurado d’aqueste pres qu’ai grand ounour de presida, e qu’es pièi coumpausado pèr Felipe Blanchet, Miquèu Courty, Glaude Mauron, Reinié Moucadèu, Andriéu Resplandin e Oudilo Rio, a decida à l’unanimeta d’atribuï lou Pres pèr 2009 à Moussu Louis Viàny pèr soun obro L’Avenaire de Lus.
Nascu dins uno famiho de gènt de la terro, en 1931, à Sant-Estève-dóu-Gres (Bouco-dóu-Rose), Louis Viany es esta, fin qu’à sa retirado, proufessour de letro mouderno dins l’ensignamen segoundàri. Avié baia d’article emai de trobo dins d’armana e de revisto, mai lou courounan vuei pèr L’avenaire de lus. S’agis d’un pouèmo d’aperaqui 5000 vers sus la vido dóu pintre Vincènt van Gogh escri dins uno lengo forto e drudo. Aquesto obro inedicho fuguè destouscado pèr Marcèu Bounet, que me permetrés de saluda aqui la memori, e que n’en vouguè metre un pichot escapouloun dins la segoundo edicioun de sa Mount-Joio de l’Escolo dis Aupiho publicado i’a gaire pèr Glaude Mauron. Coume Louis Viàny éu meme l’escriguè dins la presentacioun de soun obro, aquelo d’aqui es escricho «en rimo mouvedisso pèr baia à-n-aquéli vers lou vanc d’un flume de passioun qu’entiro tout, dins un pantai de bèuta, vers la foulié e vers la mort ».
Lou 14 d’óutobre 1888, Van Gogh escrivié à soun fraire ço que vaqui :« Je t’envoie un article sur la Provence (…). Ces Félibres sont une réunion littéraire et artistique, Clovis Hugues, Frédéric Mistral, d’autres, qui écrivent en provençal et parfois en français des sonnets assez bien, même fort bien parfois. Si les Félibres cessent un jour d’ignorer mon existence, ils passeront tous à la petite maison (…). Mais aimant la Provence aussi franchement qu’eux, j’ai peut-être le droit à leur attention… »
Mai d’un siecle après la demando dóu pintre, vaqui que van Gogh devèn un erò nostre, ilustra d’un biais magnifi dins la literaturo prouvençalo… Dins l’espèro de la publicacioun avenidouiro d’aqueste libre, bord que s’agis d’uno di toco de noste Pres, aquéu d’aqui sara óuficialamen baia à Louis Viàny dins l’autouno o l’ivèr, pèr uno dato que sara chausido en acourdanço emé lou Coumitat dóu Museon Arlaten e soun Presidènt, Jan-Maurise Rouqueto.
Vaqui coume se fai l’istòri de nosto literaturo prouvençalo. Certo, aqueste siecle XXIen se capito dificile pèr la trasmessioun de la lengo, e pèr ço qu’es de la creacioun literàri. Mai es pamens uno proun bono marco d’atrouba encaro de causo inedicho emai proun qualitouso, dins l’escasènço de persegui la tiero di Pres Mistral, l’istòri d’uno lengo e d’uno literaturo prouvençalo que volon garda soun noum, e èstre au mens autant recouneigudo que de parla d’oi coume lou santoungés o lou mourvandiau bourguignoun, e noun pas nega, au noum d’uno pretendudo « unita de la lengo » d’o, dins lou melting-pot panóucitan que fara mouri nosto èime e nosto identita la mai prefoundo …Tant que le lou pople nostre restara fièr de soun noum de Prouvençau, tant que pourren trouva d’obro tant coume aquest Avenaire de Lus que vous presentan vuei, pourren garda fisanço dins l’aveni de nosto culturo… (fin de citation)"
Dicho de Roumié VENTURO
Presidènt de la jurado dóu Pres Frederi-Mistral de literaturo prouvençalo
prounouncia à Maiano, lou 13 de setèmbre
pèr anouncia lou Pres 2009
.
.
Aucun commentaire:
Enregistrer un commentaire