dimanche 22 juillet 2012

J. d'Arbaud : La cansoun Gardiano

.






La cansoun Gardiano




A Jan Grand, Capitàni
de la Nacioun Gardiano.




1

Quand lou souleias rabino la plano,
Que sus lis estang danson li belu
A ras dis engano,
Urous quau, bloucant sa sello gardiano,
S’en vai libre e soul sout lou grand cèu blu;
Quand lou souleias rabino la plano,
Urous quau s’envai sout lou grand cèu blu.

2

Mai quouro, à l’errour, lou larg se rouviho,
Que sus mar lou jour se vèi davala
Darrié la mountiho,
Quand vers la palun la mounturo endiho,
Urous quau, gardian, vai s’encabana;
Mai quouro, à l’errour, lou larg se rouviho,
Urous quau, gardian, vai s’encabana.

3

Aro qu’an tourna li tèms d’abrivado,
Buten nòsti biòu sus li calada,
En revoulunado;
Au noum dóu pais e de la manado,
Mantenen, gardian, noste vièi coumbat;
Aro qu’an tourna li tèms d’abrivado,
Mantenen, gardian, noste vièi coumbat.

4

Coumpagnoun, d’aut, d’aut, e parte à grand erre,
Entaiolo-te, sello toun chivau,
Que te vènon querre;
Plego toun seden, aganto toun ferre,
Pèr la tradicicioun fau douna l’assaut;
Coumpagnoun, d’aut, d’aut, e parte à grand erre,
Pèr la tradicioun fau douna l’assaut.

5

Mi fraire gardian, sian qu’uno pougnado,
Mai sauvan la terro e l’us naciounau
De la mau-parado;
E belèu qu’un jour, la Raço aubourado,
Boumbira, deliéuro, à noste signau;
Mi fraire gardian, sian qu’uno pougnado,
Mai sauven la terro e faguen signau!






.

Aucun commentaire: