Joseph d'Arbaud : Lou calèu

.

Lou calèu

De l'aubo à jour fali, courba sus lou travai,
Paste la terro molo e l'aigo dins la baio.
La mouto es lisco e souplo e tóuti mi terraio
Li gaubege à ma modo e caduno a soun biais.

Fau l'oulo de l'oustau, lou fournèu de la barco,
Li gerlo pèr lou vin, l'aigo douço o lou mèu,
Sus li coupo redouno e li pichot calèu
Retrase moun idèio e fau briha ma marco.

De-fes, buta pèr moun pres-fa, maugrat l'escur,
Entre soupa, me groupe mai à la vihado ;
Pèr me teni de lume e passa la niuechado
Dins mi calèu de terro atube l'òli pur.

E lou matin, vesès sus la pasto espoumpido
Lou ferre dóu gardian, lou blouquié dóu sóudard,
La courouno nouvialo e l'auciprès amar,
Segound qu'ai oubreja pèr la mort o la vido.

Pièi, quand lou jour se fai, en me fretant lis iue,
Durbisse lou pourtau, que la clarta divino
Dou soulèu matinié picant sus la marino
Vau mai que la lusour di calèu dins la niue.

.