J.H. Fabre : le 17 novembre prochain à Vedène - Li Bericle de Vasco

.

Li Bericle de Vasco

Pèr èstre un brave chin, lou siés, segur, Vasco!
Emé tant de biais portes roupo
De sedo negro sus la croupo,
E boulegues tant bèn lou rampau de ta co
Quaud tubo davans tu l’escudello de soupo!

Res dira pas de noun: o, siés un bèu chinas,
Emé l’auriho que tirasso
Si frisoun de longo filasso,
Emé lou pitre rous d’un rigau, e lou nas
Grana negre, lusènt ansin qu’uno rabasso.

Acò’ s rèn. As bèn miés. Sus tis iue parpelous,
Bounias e pensatiéu, te vese,
En liogo d’usso, dous gros cesc
En belugo de fiò, dos taco de péu rous.
Es li bericle d’or d’un filousofe, crese.

Lou sariés, filousofe? O, lou siés, e bessai
Dounariés leicoun à toun mèstre
Pèr se trufa dis escaufèstre
E di marridi gènt. Sènso ni houi! ni hai!
Aulant vite que iéu rejougues sant Sivèstre.

Se l’embourigo es caudo e se lou vèntre es plen,
Que t’enchau l’emboui de la vido!
La ventresco en round espandido,
Lou nas souto la co, mesclant li dous alen,
Di chavano dóu jour espères la finido.

Atèndes paciènt, roupihes tranquilas;
E se perfés de la racaio
Lou cop de pèiro te travaio
Li costo, acò ‘s pas rèn: pèr suprème soulas
Alor, la pato en l’èr, coumpisses la muraio.

Aquelo pato en l’èr, signe de toun mesprés
Dis auvàri de la vidasso,
En sagesso, crèi-me, despasso
Tout ço que lis ancian jamai nous an aprés:
Vaqui coume dóu mau lou boulet se tirasso.

Vaqui, moun filousofe, uno responso au mau
Que toun mèstre souvènt envejo.
Aro que l’aveni negrejo,
Dins ti bericle d’or laisso-me vèire un pau
Lou mounde enebria d’un vinas qu’amarejo.

24 janvié 1894

.