J. Entremount : Li Tartifle

.

Li Tartifle
 

 

Li tartifle, qu’en d’àutri rode noumon trufo,
Soun la mauno pèr quau viéu pas que d’ourtoulan.
Em’ éli pas besoun de tira milo plan
Pèr cousina. Saup pas ço qu’es, quau se n’en trufo.
 

N’i’a de tóuti li biais, de ferme, de moulan,
De boudougna, de lisc, de round que fan baudufo;
Lis un an la pèu fino e lis àutri l’an rufo,
N’i’a de jouine, de gris, de rousastre e de blanc.
 

Mounte i’a forço enfant, li tartifle soun mèstre:
Es un viéure couflant coume que s’amagèstre;
E lou Gus es countènt de se n’empli lou gus;
 

Acò empacho pas qu’emé de jus de viando
O bèn emé de la, li femeto groumando
De n’en faire de plat requist counèisson l’us.

J. Entremount

.