Michello Craponne : Li cigalo - Avoust 2010

.

Li cigalo

Èro l'estiéu, lou tèms di meissoun e de la calourasso ensucanto. Auto coumo très poumo e autant bloundinello que lou blad madur, moun paire m'istalavo en soubat de l'iero, dins un pichoun vergié de cereisié e de nouguié, emé, pèr missioun de surviha la biasso di meissounié.

Eilamoundaut, sus l'ièro, quet espetacle ! Queto boulegadisso ! La grosso machino ventrarudo avalavo tout double li garbo de blad que lis ome mandavon à-de-rèng dins sa gulo badanto, pèr n'en escupi la paio d'un coustat, lou gran de l'autre, tout acò dins un nivo de póusso que s'enauravo aut dins lou cèu en pampaieto. Pièi, i'avié perèu la ventarello que me pivelavo: dins un chafaret de crussimen e de cranihamen engoulissié lou blad, escupissié perèu si pampaieto e li grano bloundo e lisco, tant douço au touca !



De tèms en tèms, moun paire me venié veire, m'adusié de cigalo brusissènto e me disié, en ié ajustant un brout de paio au bout de soun abdoumen : « Em'acò s'en van canta sus la grand'plaço d'Arle « Coume lis envejavo ! Me li figurave arribant sus la grand'plaço d'Arle, rejougnènt si sòci pèr participa en'un grand councert, se mesclant i fifre e tambourin qu'entrinavon la farandoulo pèr carriero. Dansarello e dansaire trepavon lou sòu d'un pas lóugié en aubourant un pau de póusso; la farandoulo serpentejavo entre oumbre e soulèu dins la vilo enfioucado, destourbant pèr un moumenet la sansogno di font.

Paureto! Pièi-en-rèire ai imagina la doulènci qu'avien degu endura, empachado de coumpli ço que la naturo ié demandavo de faire, ço qu'es la toco darriero de touto sa vido, perpetua l'espèci !

Mau-grat acò, ai jamai maudouta moun paire de crudalita, pense qu'en tóuto naïveta, de segur fasié que reproudure à soun tour lou jo de si rèire, sènso se pausa de questioun sus ço que fasié.

Michello Craponne
Avoust 2010

Nb : foto - meissoun 2011 - Moulegés

.