Arle reviéudado
Couneissèn lou Museon de l’Arle antico pèr li gràndis espousicioun que nous pourgis e pèr si couleicioun permanento. Sabèn un pau mens qu’es peréu un cèntre de recerco impourtant. Aqui, ié travaio Jan-Glaude Golvin, un architèite-arqueoulogue. E vuei, es si trobo, lou resultat de si recerco, que nous pourgisson dins uno espousicioun de 150 de sis aquarello e dessin : « Jean-Claude Golvin, un architecte au cœur de l’histoire ».
Aquéu Direitour de recerco au CNRS, nous presènto soun travai sus l’Arle dóu siècle IV. Uno obro de vulgarisacioun que se foundo sus de recerco e de couneissènço scientifico di mai seriouso. Soun labouratòri travaio aqui dessus despièi mai de vint an. Es dounc en saberu e en artisto que fai reviéure la vilo antico, soun forum, tiatre e tout ço que fasié sa poumpo. Aquéstis aquarello sèmblon de fotò talamen soun fino e menimouso. « Le but est de reconstruire méthodiquement une image des monuments anciens pertinente et aussi proche que possible de la réalité » nous dis. Aprouficho pèr acò di recerco e di trobo sus li ciéutat antico de la Mediterragno que nous fai vesita en meme tèms qu’Arle que gardo pamens la proumiero plaço. Se permenan ansin d’Egito à Roumo , de l’Africo à la Gaulo e au Proche-Óuriènt.
L’artisto faguè douno d’uno bono part de sis obro pèr endrudi lis couleicioun dóu Museon, obro que restaran dounc sus plaço passado l’espousicioun que s’acabara lou 6 de mai de 2012. Avès lou tèms de faire lou courre d’Arle pèr l’ana vèire.
*
Nous es l’óucasioun de ramenta un grand e bèl oubrage pareigu en 1984, souto lou titre « En Provence gallo-romaine, évocation des monuments antiques ». Lou devèn à J. François-Robert, éu tambèn architèite, qu’avié treva li vilo roumano d’Africo e s’èro di de ressucita li mounumen anti de Prouvènço. Mai de cinquanto mounumen respelisson ansin e s’aubouron de si rouino (Arle, Nimes, li bàrri de Marsiho, Frèju, Ate, lou Troufèu d’Aguste, Glanum, etc.). A coustat di gràndi recoustitucioun, de dessin mostron ço que n’en rèsto à l’ouro d’aro e de tèste esplicon l’istòri.Peireto Berengier
Jean-Claude Golvin, un architecte au cœur de l’histoire, Museon de l’Arle antico, fin qu’au 6 de mai e 2012
.
Aucun commentaire:
Enregistrer un commentaire