Carle Darwin
Un double anniversàri emé lou bicentenàri de sa neissènço e lou cènt-cinquantenàri de soun oubrage sus la teourìo de l’evoulucioun.
Segur qu’inventè pas aquelo idèio mai i’estaquè soun noum en la teourisant e boulouversè lou mounde. Un pau coume Copernic qu’empachè lou soulèu de vira à l’entour de la terro...
Vuei aquelo teourìo es forço discutido e se parlo meme de « sintèso neoudarviniano ». Valènt-à-dire que de saberu dóu mounde entié s’acordon pèr dire que « l’evoulucioun » esplico pas tout. I’a un biais naturau, bèn segur, mai fau quicon mai… Coume lou bing-bang, que coumençon de dire qu’èro pas soulamen de naturo chimico o fisico. Aqui peréu fauguè un quicon de mai.
Deja Darwin, avié tuerta li counsciènço e s’èro pas fa d’ami dins li diferènti Glèiso dóu mounde. D’aro en lai, la Biblo sarié plus uno biblo…
Savié de Fourviero, dins si predicanço dins la glèiso Sant-Laurènt de Marsiho, raport à la « Creacioun » avié de mau à tout esplica. Dubert i nouvèuta, assajè pamens de pas nega lis avançado de la sciènci sènso pèr acò renega sa fe e lou dóume de la religioun. Vai ansin qu’esplicavo, que i’avié bèn uno evoulucioun coume lou disié Darwin, mai « Quaucun » beilejavo bèn aquelo evoulucioun. E vuei, sian pas liuen de la memo idèio emé d’ùni sabènt american.
Un autre Prouvençau (e Rouergas), l’entoumoulougisto Jan-Enri Fabre, aguè uno longo courrespoundènci emé Darwin. Eu nimai èro pas d’acord en plen emé lou saberu anglés e aquelo courrespoundènci fasié proun avança lis idèio di dous coustat. Malurousamen calè emé la mort de Darwin. Uno grosso perto, que belèu se sarien pouscu acourda e nous leissa uno nouvello teourìo qu’agrade en tóuti.
Aro, lou darvinisme es mai uno ideoulougìo qu’uno teourìo soucamen scientifico. D’ùni, d’aiours, voudrien faire teisa li nouvèu scientifique que, de garda l’idèio darviniano d’éugenismo, acò’s soun interès. Mai i’a pas qu’acò, li scientifique an d’obro e faudra de tèms pèr uno “evoulucioun” dis idèio e pèr saupre enfin la verita. S’un cop la sabèn…
Peireto Berengier
.
.
Aucun commentaire:
Enregistrer un commentaire