Peireto Berengier : Li glèiso dóu Mercantour

.

Li glèiso dóu Mercantour :

SANTO-CROUS DE SANT DALMAS

Entre li valèio de Vesubìo e de Tinèio, la poulido Vau de Bloro escound de tresor precious. Vous diren, vuei, qu’aquelo glèiso SANTO-CROUS, À SANT DALMAS.

Santo-Crous fuguè bastido aperaqui, l’an 1000 pèr de mounge vengu de San-Dalmazzo dins li valèio prouvençalo dóu Piemount. Èro bastido coume uno basilico, em’uno souleto croto. Lou priour n’èro un di mai impourtant dóu dioucèsi de Niço.

Au siècle XII, apoundeguèron li crouteto nord e sud quouro reçaupeguèron li relicle de la Santo Crous que ié baiara soun noum. Vuei, de tout un priéurat, nous rèsto que la capello vengudo glèiso dóu vilage.

Dins li siècle XVI e XVII, fuguè proun trasfourmado e vuei avèn dounc uno glèiso marcado de dos gràndi pountanado (lou proumier Art Rouman Loumbard e lou Barrò) e classado Mounumen Istouri (coume si campano) tre 1943.

Mai vaqui la souspresso…

Lou païs fuguè sèmpre marca pèr de terro-tremo e se pènson qu’au siècle XVII, lou darrié d’uno longo tiero faguè coula un flume de terro qu’empliguè la glèiso e la croto dóu nord en partido. Aquesto, devenguè oussuàri e coume lou sòu avié mounta emé touto aquelo terro, durbiguèron uno nouvello porto e cavèron quatre escalié pèr davala dins l’oussuàri.

Coume, au siècle XVIII, li reclicle fasien plus veni lou mounde, li gènt de l’endré acabèron de rampli la glèiso sus 1,50 m aperaqui, pèr èstre tout bèu just à la nautour de l’autar.

La proumiero croto, aquelo dóu centre, se ié poudié plus rintra que pèr la crouteto dóu miejour. Ramplaçèron l’enfustage de bos pèr uno vòuto de pèiro trop pesanto pèr li pielo e fauguè alor mounta d’arcoulo deforo. Lou dedins fuguè rebouca e pinta dins lou biais dóu barrò. Apoundeguèron d’autar sus li coustat e bastiguèron uno tribuno à l’intrado que vuei eisisto plus.

Remountèron lou clouquié qu’avié toumba dins lou terro-tremo e un porge davans, emé lou martire de Sant Dalmas de pinta.

Pièi un bèu jour,, i’a quàuqui desenau d’an, s’avisèron que i’avié quaucarèn souto aquéu sòu e cavèron. Vai ansin que tournèron destapa lou sòu ancian, li sèt escalié que mounton à l’autar e li quatre que menon dins li croto.

Vuei, se pòu tout vesita en fasènt lou tour coumplèt di croto souto l’autar. Pèr rintra, es bas e se fau plega… (bord que plegan souto lou pes di pecat nostre). Aqui se pòu vèire uno fresco de la Passioun, un vas de nard, uno courouno d’espino, un autar poulicrome. Pèr ressourti de l’autre coustat, poudèn resta de dre. La grando arco lumenouso es simbèu de la pureta qu’avèn retrouba en pregant.

Dins la grand glèiso, amount, se pòu vèire de pinturo dóu siècle XVI (Sant Francés, Sant Jan lou Batiste, Santo Madaleno pecadouiro, etc., de lauso de toumbo caroulengiano, d’autar di siècle XV e XVI, e plen de tresor à descurbi.

SANTO CLARO DE VENANSOUN

En fàci de Sant-Martin de Vesubìo, un vilajoun quiha recato un tresor espetaclous. Es Venansoun emé sa capello Santo Claro à l’intrado.

Li pinturo e li fresco dóu siècle XV, de Jan Baleison, la rèndon unico qu’atapon la toutalita di paret e de la vòuto. Aquéu pintre, vertadié enluminaire, faguè uno obro que nous espanto pèr la frescour de si coulour e sa counservacioun.

Li caro soun fino, pintado menimousamen. Li persounage, dins de pauso simplo sèmblon calme. Tout i’es gracious. Ié trouban Sant Sebastian, li sant aussiliàri e garissèire dis Aup. Li vice e la vertut ié soun representa e tambèn la bono e la marrido preguiero (la dóu mounge e la dóu gentilome). Tout es simple emé li eisino de cade jour (fielouso, drai, trancadou, moulin, etc.)

Un retable emé lou Crist crucificat represènto lou martire de Sant Sebastian trauca de flècho.

Souto la vòuto, i’a li malur de la vido de Sant Sebastian : uno vertadiero BD en trege fresco ! Mai Sant Sebastian i’es pas soulet que de fresco nous ramenton peréu li sant prouteitour: Santo Apoulino, Santo Barbo, Sant Blàsi e Sant Laurèns, Sant Micoulau, Sant Bernat dis Aup, Sant Maur, Santo Catarino, Santo Margarido, Santo Claro (que baiè soun noum à la capello), etc.

Li vertu ié soun representado pèr l’Umelita, la Casteta, la Carita, la Fraternita, la Temperanço, la Paciènci e la Vigilènci.

Pèr li vice avèn : l’Ourguei, l’Avariço, la Lussùri, la Coulèro, l’Envejo, la Paresso, representa pèr de Prince mounta sus de lioun, de mounino, de bòchi, de pantèro, de porc, de reinard e d’ase…

E pièi, fau pas desóublida Santo Lucino que faguè péutira lou cadabre de Sant Sebastian de la fango pèr lou faire ensepeli dignamen, de sceno d’epidemìo, de miracle, uno maternita, etc.

Aquelo capello es un tresor, un vertadié catechisme en BD !

LA MADONO DE FENÈSTRO

La Madono de Fenèstro es un paradis dins l’auto mountagno, un di grand site dóu pargue dóu Mercantour, dins la valèio de Vesubìo, à-n-uno ouro de camin d’à pèd de l’Itàli e, un pau mai liuen de la famouso Vau di Meraviho…

Aquéu santuàri, à 1904 mètre d’auturo, es recata dins un ciéucle de mountagno que lou Gelas, lou doumino de si 3143 mètre. Se capito la cimo la mai nauto dis Aup-marino. Es marca dins li doucumen tre lou siècle XIII mai de segur que se devino mai ancian (belèu siècle IX). Proumié di Beneditin de Borgo San-Dalmazzo, passè pièi au chapitre de la catedralo de Niço, e fin finalo à la curo de Sant-Martin de Vesubìo. N’i’a meme que n’en fan, segound la tradicioun ouralo, un doumaine templié e un endré poupla de fado.

Tre l’Antiqueta, uno vìo passavo d’aqui pèr mena vers lou còu de Fenèstro (2474 m) e lou Piemount italian. Èro la routo de la sau, entre li Vau de Bloro e de Vesubìo e la Vau de Gesso.
L’etimoulougìo de Fenèstro vendrié de “Finis terro” (coume lou Finistère), aquéli frountiero latino que seguissien li serre d’alentour. Nosto Madono sarié dounc la « Madono dóu bout dóu mounde ». Mai uno legèndo se i’es vengudo encerta bonodi uno traucado, que se ié pòu vèire lou cèu de l’autre coustat, dins lou Caire de la Madono, uno roco darrié lou santuàri. La Vierge i’aurié fa d’aparicioun.

Aquéu santuàri es lou mai naut de tout lou dioucèsi de Niço e lou mai ancian. Soun istòri es aquelo di pople de la regioun.

Lou dedins de la glèiso es barrò mai patiguè, long di siècle, de plusiour incèndi. Au siècle XIX, restaurèron lou bastimen e touto la decouracioun. Es lou moudèle di santuàri dis Aup.

L’autar majour es dedica à Nosto-Damo de Fenèstro que soun estatuo poulicromo, de cèdre dóu Liban, datarié dóu siècle XIV. Degun n’en saup l’óurigino. Li miracle soun noumbrous que lou mounde i’estacon (e lou proumié miracle es de l’agué encaro talamen bèn counservado maudespié lis incèndi…) Un doucumen data de 1647 la farié remounta à Sant Lu l’evangelisto. Marìo-Madaleno l’aurié aducho à Marsiho e d’aqui li Templié vers lou santuàri… Ço qu’es dificile de crèire es que datarié de Sant Lu, mai tant es bèn poussible que vènguèsse de l’Óuriènt e que li Templié l’aguèsson menado au nostre, bord que soun bos vèn d’eilà !

Li proucessioun, dous cop l’an (15 d’avoust e 8 de setèmbre), menon un fuble de mounde dis alentour. Vuei, en setèmbre, l’estatuo, ié fan prene pensioun dins la glèiso de Sant-Martin de Vesubìo ounte l’avien deja escoundudo dóu tèms de la Revoulucioun. La menon en proucessioun e la remounton en jun, dins uno autro proucessioun.

Segur qu’aquéu santuàri beneditin èro mai que mai un santuàri-refuge pèr li viajaire e subre-tout dins li tempèsti. Aquéu refuge founciouno sèmpre pèr li randounejaire (oustalarié e retaurant).

A l’entour, s’espacejon de chamous à bóudre e li marmoto que siblon à plasé. Li flour de printèms e d’estiéu ié fan tepiero. La routo que ié mounto rescontro lis aigo cascaiejanto de la Vesubìo. Un vertadié paradis!

Peireto Berengier


.