Pèr l’Aigo !
Se saup que Marsiho es en tèsto pèr li recerco sus l’aigo e que l’aigo que ié bevèn se devino sèmpre la meiouro de Franço ; acò meme dins de countourole fa pèr de parisen… es tout dire !
Marsiho es tambèn un cèntre moundiau pèr l’aigo e l’an que vèn se ié debanara de manifestacioun moundialo. Mai lou 22 de mars de 2011, Marsiho e la SEM (Société des Eaux de Marseille) marquèron bellamen la Journado moundialo de l’aigo.
E vo, la SEM faguè grando pèr l’educacioun di pichot, pèr l’aveni dis aigo mai peréu pèr nosto lengo ! Vaqui lou coume.
Aquéu 22 de mars, uno classo de 5enco dóu coulège Pasteur, faguè la vesito dóu tratamen dis aigo de Santo-Marto à Marsiho. Vesito tout au cop en francés e en prouvençau emé soun proufessour, Jan-Miquéu Turc, que i’ensigno lou prouvençau tout de long de l’annado. Fuguèron li bèu proumié de reçaupre uno BD sus « Leis aventuro de Louleto e Loulou », dous degout d’aigo bèn simpati.
Aquelo BD, ilustrado pèr Didié Sorelli, eisisto de segur en francés mai fuguè peréu revirado en prouvençau pèr Jan-Miquéu Turc. Uno lengo granado, un marsihés que vous ravi, pèr counta l’istòri de l’aigo que bevèn e que souvènt degaian de trop.
Louleto e Loulou nous dison tout despièi la neissènço de Marsiho e lis aigo dóu riéu e di palun qu’utilisavon li Grè fin qu’à l’aigo de vuei, en passant de l’Age-mejan emé lou port-aigo de la Porto de z-Ais o lou canau de Marsiho de Montricher emé lou porto-aigo de Roco-favour e lou palais Longchamp. Touto la teinico de vuei pèr assani l’aigo es esplicado e noste devé de l’apara.
Louleto e Loulou parton dis aigo di nevié aupen e se rerobon fin-finalo dins nosto mar Mieterrano pèr ana faire un tour en Africo… Louleto esplico tout à Loulou. Saup se ié prene pèr faire coumprene clar e eisa ; e s’aquelo BD es virado pèr li pichot, li grand i’aprenon forço tambèn sus l’istòri e la teinico. Sièis chapitre pèrtout nous dire :
- « Louleto s’aprefoundisse dins l’istòri »,
- « Louleto e lou canau de Marsiho »,
- « Louleto meiouro gouto de Franço »,
- « Louleto retrobo la mar »,
- « Louleto lampo ei quatre cantoun de la vilo »,
- « Louleto fai lou viage en Africo »,
Un bèu travai, uno bello idèio de la SEM, coumpleta pèr :
- L’eau est notre trésor un caièr pèr lis animacioun dins lis escolo,
- Un jo de l’auco de Louleto pèr esplica lou tratamen dis aigo
- L’aquapiste, un autre jo emé de questioun coume dins un Trivial poursuit.
Despièi lou 22 de mars, poudès telecarga la BD sus lou site : www.eauxdemarseille.fr
E pèr mai d’entre-signe poudès prene lengo emé Soufìo Vague : Tel. : 04 91 57 60 76 vo 06 1 41 83 77.
Peireto Berengier
.
Aucun commentaire:
Enregistrer un commentaire