À touto criso, sa soulucioun
Ah ! nous n’en fan de bello lis agricultour. Sabèn tóuti que nous volon faire empassa touto meno de pourcarié, mai cade jour n’aprenèn de nouvello. Vai ansin qu’un journalet de l’Ardecho nous esplico plen de nouvèuta.
Au siècle XX, à forço de seleiciouna li grano an proudu de resultat espetaclous.
Li cabro cambadejavon dins li colo, e li clapié li restancavon pas. Soulamen, fasien pas tant de la. Aro, an tripla sa prouducioun coume li vaco que, liogo de 3000 litre de la cade an, n’en pourgisson 10.000 litre e soun devengudo d’usino lachiero sus pato. Lou proublèmo di cabro es que si piés tocon lou sòu e lis empachon quand i’a d’argelas o àutri baragno. Parié pèr li tau de councous que sis afaire rason li mouto. Li moutoun, trop bèn seleiciouna, si pato li porton plus. Vous dounon de bèu gigot mai an de mau a davala li pendis cevenòu. Urousamen qu’eici avèn garda de raço anciano e asatado au païs. Aiours, i’a de bèus estable, bèn plat e bèn cimenta ounte riscon rèn e de pradarié flourido bèn plato tambèn.
Tout anarié dounc charmant se la seleicioun naturalo bastavo. Mai, buta pèr la foulié di grandour, li labouratòri e li cercaire passon li terme, galoi e sènso se soucita di relacioun emé la Naturo que se degaion à flour e mesuro. Soun ansin arriba i famous OGM.
Vaqui dounc qu’un cartabèu de granatié prepauso de grano de poumo d’amour que podon faire 1,8 kilò, eisa ! Soulamen, finot, vous vèndon de grano que se reprouduson pas e cade an vous fau tourna paga la semenço… Faudrié parla tambèn de ço que se passo pèr lou blad, lou barbarié, lou ris, etc.
Ai garda lou plus bèu pèr la fin. Vous arribo souvènt de manja de dindo. Bon, s’es uno dindo entiero, es bèn uno dindo. Rintro dins voste four. Se croumpas d’escalopo o de roustit, de vèire sa groussour, vous imaginas eisa la bestiasso. En realita, es plus uno dindo mai un dindoun, un gabre. Li mascle se fan mai bèu e mai vite, es tout proufié. Proufié, belèu pas pèr éli… Segur que li van tintourla, li faire manja soun sadou emai mai, soulamen ié sara enebi de courre e de s’espaça pèr se pas fatiga e se sarraran à cinq sus 1 m2 ; de cop que i’a, saran 10.000 ensèn, sènso ges de fenèstro. Urousamen que li poutingaire soun aqui pèr ié leva li risco d’enfecioun e lis ànci. Mai alor, queto bello bèsti ! 20 kilò, eisa. Mai, mai… I’a encaro un mai… S’avès dins vòsti sieto de tant bèu moussèu, es que li pàuri gabre soun esta seleiciouna pèr agué lou pitre lou mai larg, lou mai bèu. Talamen bèu, lou pitre, que, pecaire, podon plus caligna si dindo. Es aqui qu’an trouba la meiouro soulucioun en tèms de criso : an enventa un nouvèu mestié : « brandaire de gabre »… De brave mounde li prenon sus li geinoui, li flatejon e papouion mounte fau afin que li gabre dounon soun esperme. Vèn pièi lou teinician emé sa seringo e segur que la dindo a pas tant de plasé que lou dindoun… Mai vous lou disiéu : à touto criso, sa soulucioun, em’un mestié de mai, segur que lou caumage vai beissa !
Aucun commentaire:
Enregistrer un commentaire