Paul Froment : ESPERENÇO - 1897 - Villeneuve sur Lot

.





ESPERENÇO


*-*-*-*-*

A l'amic A. Salères.

Lou roussignol m'a dit : « Cantaire,
Que t'enrauces ô paure amit ;
Galo te, bai,'podes te taire,
Ço qu'as dit, pla d'autres z'an dit !
Tu, pouèto ?... nou, rimalhaire !
Ta muso, bestido en pelhaire,
Dins soun èl n'a pas un esclaire,
Sus soun frount n'a pas cat de rai !
Ta liro s'esclafalho touto,
Tindo coumo uno esquilo routo...
Resto dounc mut, crei m'en ; escouto
Ma cansou que belèu bal mai... »

La margarido de las prados
M'a dit : « Jouvent, perque canta
Se las aurelhos soun barrados,
Se digun ben per t'escouta?
Perque fa pintra la berduro,
Lou soulel que nous escauduro,
La beutat que passo ou que duro,
— Lun sans oumbro e flambo sans fun —
Lilas, rosos, pimpareletos?...
Parles pas mai de las flouretos :
Al loc de canta mas sourretos
Culis los, beu-n'en lou parfun...

La filheto bruno e mignardo,
Al parla tant dous, à l'èl biu,
Que, risento, sus soun frount gardo
La frescou d'uno nei d'estiu
Mesclado à la blancou del lire,
Aro m'a feit, en un sourire :
« Dins tous bers aï loc de tant dire
Que sei bèlo e que m'aimarios;
Prend dins toun bras ma talho prino,
E perque tant crides famino
D'un poutou, sus ma gauto fino,
Cal t'arresto, se lou boulios?... "

E las estèlos que lusisson
De lassus m'an cridat : « Efan,
Per nous aus tous cants espelisson,
Mes de tas rimos nous trufan !
Boudrios sabe ço que se passo
Dins l'estendudo ount Diu nous casso?...
Mes ia pas caminol ni traço
Qu'aissi posque un jour te mena !
Daban lou cèl toun ourgul toumbo ;
Soùrtiras jamai de ta coumbo
Que per dabala dins la toumbo
Ount, per forço, te cal ana ! »

*-*-*




Atal m'an parlât l'esteleto,
La flou, l'antge e lou roussignol.

Te cantarei dounc, ô filheto
Sans doulou penjat à toun col ;
E se d'ausi moun cant d'agasso
L'ausèl del bos fai la grimaço,
Trobo mai de brut que de graço
Tant pis ! mes, jou, boli canta...
Pintrarei las flous qu'abrièl meno ;
E, se la terro es ma cadeno,
La mort ressegara sans peno
Lou nouet que m'empatcho à mounta ...

Flous de Primo
Rimos d'un pichot Paisan
de Bilonèvo sur Lot
1897
.