lundi 18 mai 2015

Jaque lou Soci. : La Rento








La Rento 


N'a pa proun dei sètanto anado 
Que mi plugon souto soun pes 
E doou maou que ti ten couchado, 
Ma paouro frumo! l'a siei mes, 
Faou enca que nouestre calvàri 
Siegue plus gravous e plus aout: 
Faou que noueste prouprietàri 
Nous vougue plu dins soun oustaou! 
Aqueou mandrin a pa'gu crento 
De dire à l'uissié de veni 
Per qu'aven pa paga la rento 
De siei mes qu'à peno an feni! 
Pamens, despuei nouestre mariàgi 
— L'a d'aco quaranto-cinq an — 

Aven douna per lou lougàgi, 
Ei semèstre, cent trento franc 
Vuei pouden plu. Tu, sies malaouto; 
Ieou, moun gazan es pa grana... 
Per pasta la forço mi faouto, 
Ni mai pouedi plus enfourna. 
Viei, d'un fournié sieou lou manobro: 
Ei chalan de mèstre Pignoou 
Pouarti lou pan, e per talo obro, 
Toqui, per jour, quaranto soou. 
Lou vieoure e touti tei remèdi 
Acabon gàgi, capitaou, 
E vouelon plu nous faire crèdi; 
Coumo poudrian paga l'oustaou! 
— Alor couchas à la carrièro, 
Lei vieih, que vouestro vida entiero 
Avès passa souto lou fai. 
E bord qu'avès plu la nerviho 
Coumo avant, per gagna l'arbiho, 
Dins l'oustaou sias plu qu'un varai. 
Sortès, anen, car es pa vouestre.  
Mai poudrian dire à n-aqueou mouestre 
Que nous sagato per lei soou: 
— Coumo! bourreou avès lou fùgi 
De nous demarra doou refùgi 
Qu'aven aou mens paga douei coou? 
Mai avès dounc pa pres la peno 
De chifra touti lei dardeno 
Que cade sièi mes vous porgen. 
Que roueigon nouestrei semanado 
Despuei quaranto-cinq anado? 
Fa quatre milo escu d'argent! 
E quand poou vouié voueste estànci 
Que dins l'estiou sènte lou rànci 
E l'iver, dins touti seis us, 
De cade caire la cisampo 
Per nous rafreja si l'acampo? 
Cinq milo franc e tout beou just. 

Adounc, s’aou lué de tant de vici, 
Lou mounde avié'n paou de justici, 
Deourian-ti, vieih, s'estoumaga, 
E d'un abri serian-ti sènso? 
Serié-ti pa nouestro chabènço 
L'oustaou paga e repaga?...  
Mai lei cavo ensin soun bastido! 
De maniero que dins la vido, 
Lou paoure, que, souventei fes, 
Lou manco de travai chirouno, 
A la rènto d'un oustaou douno 
Per n'en croumpa dous e n'a ges... 
L'a pa quaoucarren que v'encagno 
De veire que quand l'ome gagno 
De mouloun d'argent en laourant, 
Aquel argènt, plan plan resquiho 
Finco à la darniero ceniho 
Dins lei det dei caoutaou furan?... 
Es fouart! mai n'ai v-uno pu redo 
Car es pa ren que la mounedo 
Levado aou paoure per l'oustaou 
Que vaou pa tant que lei denàri 
Dei mèstre, dei prouprietàri: 
Aoussito l'a lei capitaou. 
De capitaou? De nouestrei pago 
N'en ferian; croumperian tei bago, 
Ma mouestro a ta chèino à sièi tour... 
Adounc poudrian paga la rento 
Qu'à l'ouro d'uei nous despoutento 
E si tira de noueste gour! 
Mai, pu duro qu'uno vipèro, 
La misèri 'mé sei dènt fèro, 
L'a dous an, nous a sagata 
E nous a força — que tristesso! — 
De metre, dins nouestro vieihesso, 
Lei beluro aou Mount-de-Pieta! 
Aqui nous fèroun veire coumo 
Nouestre capitaou, d'uno soumo 
De tres cent franc, à juste près, 
N'en vougué plu que cent cinquanto. 
Que m'an presta, d'uno man santo, 
Contro dès per cent d'interès; 
Ensin, lou jaoujon à bel èime, 
Nouestre avé, e pagan lou dèime 
Per lei soou que nous an presta. 
Pamens nouestre or a memo fusto 
Que lou sieou, e la resoun justo 
Mete en touei dous l'egalita. 
Mai, que l'argent doou travaiaire 
Siegue capitaou mes de caire 
Vo mounedo per lou tran-tran 
De cade jour, tout dispareisse, 
Quand d'aqueou doou riche n'en neisse 
De jitello touti leis an... 
Coumo eis aoutre aco nous arribo. 
Aro que, vieih, sian su la ribo 
D'ounte resquihas dins la mouart... 
Sies malaouto; moun corp drandaio 
Aven plu ren, ni soou ni maio 
E de n'en trouva ges d'espouar. 

*    * 

Pamens lou mèstre voou la rento 
Vo que barroulen l'escalié 
Sènso pieta per tu, doulento, 
Que poues plu boulega doou lié, 
Coumo faire? S'avieou la forço 
Per gagna l'argent que voou mai 
Mi veirien courre à poujo, à orso 
Per ana cerca de travai. 
Serieou souto emé ges de cesso; 
Regardarieou pas lou mestié, 
Basto touquèssi proun de pèço 
Per estre toujour sei rentié. 

Oh! que dieou?... Lou sang dins mei veno 
Bouie encaro, mai ma cadeno 
Devèn coumo un cieoucle; emé peno 
Mei cambo pouedon mi porta... 
E puei, que serto si fa d'ànci? 
S'a pas la rento de l'estànci 
Lou veiran pa mouri d'estrànci 
Aquel ome senso pieta. 
Mai li pensi, mai moun idèio 
Mi dis que serié 'no risèio 
D'alonga tant si poou la lèio 
Deis escut que l'aven remes; 
M'es egaou que fague la moio, 
De li douna n'ai plu la voio, 
Que vague si fa roumpre aou boio! 
Poou manda l'ueissié milo fes, 
Sortiren pa, vendrié 'no armado. 
Bord qu'en quaranto-cinq anado, 
A touca la valour doublado 
De soun capitaou de leiroun!... 
Pamens lou mandri gulo e bramo 
Mai es senso dret que reclamo 
E crèidi de touto moun amo: 
Es nouestre, nouestre pesaroun!.. 
Vengoun! Bèn que ma forço mermo 
Ti respouendi que serai ferme. 
Boulegarai pa mai qu'un terme 
Fin qu'à nouestre darnié badaou... 
Pouedon veni faire l'empèri; 
Nous faire mouri de misèri: 
Nous portaran aou çamentèri 
Mai, vieou, quitaren pa l'oustaou! 



Jaque lou Soci. 


************************ 






Aucun commentaire: