AU FELIBRE JAN BRUNET
Ome, tu qu'as ploura coume plouron li femo,
Tu, Brunet, coume iéu, d'abord qu'as vist mouri,
Ah! toco-me la man, mesclen nòsti lagremo,
Mai-que-mai, tóuti dous, poudèn nous dire ami,
Aro que, tóuti dous, avèn dessouto terro
La car de nosto car, eila, que nous espèro.
Aro que, tóuti dous, quand rintran dins l'oustau,
Trouvan quaucun de-manco, e voulèn pas ié crèire;
Cercan de mèmbre en mèmbre, e d'en bas, e d'en aut;
Sèmblo en tóuti li pas, sèmblo qu'anan li vèire;
E cercan de pertout sènso li rescountra;
E pièi, las de cerca, finissèn pèr ploura.
Mai, de-bado plouran: mancon à la taulado,
E quand vèn pèr manja, tóuti n'avèn plus fam;
De-vèspre, après soupa, mancon à la vihado;
Plus res babiho plus, sian mut en nous caufant.
Nous anan coucha d'ouro, e li niue dourmèn gaire:
Tu veses toun pichot, e iéu vese moun paire.
Paure enfant! tout-bèu-just sabié dire: — Mama! —
Quand de soun pichot bres, en risènt, s'aubouravo;
Vers ta femo, Brunet, e que voulié teta;
E, pèr teta 'nca pau, de-fes-que-i'a, plouravo,
E voulié pas dourmi: l'aviés lèu assoula,
O maire, em' un poutoun, em' un degout de la!
De sa bouco, au teté, l'enfant se pendoulavo,
E, souto toun fichu, pièi quand vouliés jouga,
Toun teté, l'escoundiés, e l'enfant t'escalavo,
Emé si pichot det venié lou descata!
E, trefoulido, alor, dins ti gràndi brassado
Lou sarraves, o maire uno longo passado!
Paure vièi! rede e blanc, l'ai vist dins si linçòu;
Counjala pèr la mort, l'ai vist moun paure paire:
Èro tranquile e bèu, e iéu i' ai sauta au còu;
Tóuti, à soun entour, tóuti disien: — Pecaire! —
Paure vièi tant ama! paure enfant tant urous! ...
Plouren, que fai de bèn, ah! plouren tóuti dous!
De iéu, de tu, Brunet, de vous peréu, madamo,
Siéu pièi lou mai de plagne... ah! digués pas de noun!
Sias jouine, mis ami, e lou bon Diéu vous amo;
Bessai dins quàuqui mes aurés un enfantoun:
Diéu pòu rendre, quand vòu, un enfant à sa maire,
Mai iéu, o mis ami, quau me rendra moun paire?
*+*+*
Aucun commentaire:
Enregistrer un commentaire