LOU VIÈI MÉSTE RAMPAOU
Es l'ouro doou repaou. Tounin quiten l'eissado:
Tout aro revendren acaba la journado.
Souto lei pinateou escalen s'asseta,
L'ooudour doou roumanieou sera noueste gousta.
Aimi veni su d'esto couelo
Mounte l'aoureto fresco vouelo,
Din lei ginèsto, din lei flou.
E nous fa senti lei seniho
Dei prefum que raoubo eis abiho.
Prefum de que moun ples es glout.
O, Tounin, ma paouro carcasso
Que lou gros vieùgi matrasso
A besoun de respira l'èr
Que caresso la terro aimado
Mounte ai passa sètanto anado
Aou travai, l'estieou e l'ivèr.
O, moun felen, o, vouéli vèire
Mai, lou terraou que nouestei rèire
Croumpèron quand èro un campas
Nourrissènt pa'no boueno grano,
E qu'enfoundrèron cano à cano
Mé la nervio de sei bras!...
L'a mai de quatre cèns anado,
— Disiè, souvent à la vihado,
Moun grand, que va sabié doou sieou —
Desempuei qu'un de nouestro raço
N'entamenè quaranto brasso;
Levè, derrabè fleou à fleou,
Doou capeou finqu'à la racino.
Erbo fèro, planto d'espino.
Bandissè lei pu gros queiraou.
Plantè de maioou uno tiero,
Samenè de bla, faguè l'iero
E bastissè 'n pichoun oustaou.
Lei decendènt de Rampaou Pèire
— Ero lou noum de nouestre rèire —
Enfoundrèron de paire en fleou
Touei leis an quaouquei carteirado
Que siguèron touti plantado
D'aquesto couelo finqu'aou rieou.
Alor, dei Rampaou, dès famiho
Travaiavon coumo l'abiho
Que su lei flour cerco lou meou:
Laouravon, e puei la culido
La portavon din lei bastido
Que dei Rampaou, vuei, es l'ameou.
O, la terro que nouestrei paire
An esventra, mé seis araire.
Affar, bastidouno, casaou,
Coulet, valadoun, aoubre, planto.
Tout ço que d'eici l'uei aganto.
Tout èro l'avè dei Rampaou.
Mai vai cerca ço qu'es la chanço!...
Despuei lontemp la benuranço
Rajo plus din nouestrei boussoun.
Despuei longtem lei bellei terro
— En li pensant moun couar si serro —
Lei bastidouno, lei meissoun
Que nouestre travai rendié 'spesso.
Enfin touto aquelo richesso.
An escapa de nouestrei man
Pèr ana faire lou benèstre
D'aqueou marchand qu'es nouestre mèstre,
Qu'a tout croumpa... en pas remant.
Moun rèire, carga de famiho,
— Avié cinq garçoun e noou fiho —
Sieguè fourça per alesti
E pèr abari sa marmaio
De pica sus la cacho-maio,
E sigué vite tout sourti.
Ço qu'es dei famiho favado!...
Tres de sei garçoun à l'armado
Soufrissèron sèt an cadun;
Doou maou la vigno sieguè presse.
Puei arribè la secaresso
E restè ni paio ni fun.
Alor, lei deoute emé sei lagno
Venguèron embuia l'escagno:
Fougué vendre un mouceou de bèn
Puei fougué vendre uno bastido.
A cha paou touti soun partido:
De tout l'avé nous rèsto ren!...
Qu croumpe tout?... Es pas de crèire!...
Qu croumpe tout, tout?... Es leu rèire
De nouestre mèstre. Ero marchand,
E s'èro douna per oubragi
De veni din nouestrei vilagi
Croumpa la fruchaio dei champ
Amèlo, pessègui, rin, poumo,
V'avié per de pichounei soumo;
N'en cargavo dous vo tres ai;
Va pourtavo tout à la vito;
Emé la councienço tranquilo,
Ei gent va vendié tres coou ruai.
Sei fieou marchèron dins sei piado,
E d'escu n'aguèron de niado,
Coume eou siguéron coumerçant.
E la terro que deou la vido
A nouestro obro, ue l'a 'spelido,
La terro es plus de nouestre sang!...
Aven plus rèn, plus pa'no mouto!
Aoussito lou pegin si bouto
Din ma vièio carcasso routo;
E bord que devenen gourrin,
S'èri pas pres pèr lou vièiùgi,
Su la facho dei sènso-fùgi
Qu'an mes lei peisan au bourrùgi,
Anarieou 'scupi moun verin!...
Bord que lou travai e la peno
De qu laouro, enfoundro, samello,
Servon qu'a fa riche uno meno
De feniantas, de trafiquant;
E bord que la terro dei paire
Rèsto plus l’avé dei laouraire,
Que vèngon lei descaladaire!
Seran segui pèr lei pacan!
O, que vèngon! seren pèr orto!
Nouestre fusieou fara recorto
Se’méli fèn uno revorto
Contro nouestrei gardo-fouçat...
Que vèngon! coumo de tounerro,
Toutis ensèn faren la guerro
Pèr pousqué fa raca la terro
Ei mandri qu'an tout ramassa!
Car, bord que nouestrei terro aimado
Soun plus de qu leis a laourado,
Que m'es que siegon arrapado
Pèr lou gouvèr, qu'es lou coumun?...
Que v'arrape tout la coumuno!
E que de touti lei fortuno,
Terro, oout!s, n'en fague plus qu'uno:
Ço qu'es de touti's de cadun!...
An resoun lei descaladaire!
E se lei jouino sabon faire,
La terro facho pèr lou paire
Sera pèr lei travaiadou;
E lou peisan que la travaio
N'en sera pas, vièi, paoure à maio,
Bandi pèr la richo racaio...
Ah! que vèngue, lou viro-tout!
L'aoureto, vuei, coumo uno fouelo,
Sus lei roumanieou de la couelo,
Sus lei flour, lei ginèsto, vouelo,
E mi fa respira sei prefum à cha paou.
Eici voudrieou resta jusqu'aou darnié badaou.
Mai lou souleou es su lei pouncho..
Anen leou faire enca'no jouncho
E rapèlo-ti bèn, Tounin, sènso repaou,
De tout ço que t'a di toun grand paire Rampaou.
Jacque lou Soci.
Aucun commentaire:
Enregistrer un commentaire