LA PIÉUCELLO
Pèr agué de ti sòu sabe ço que fau faire:
Ai uno chato, èi jouino, èi gaiardo, a sege an!
De mai bravo, n'i'a ges; de tant bello, n'i'a gaire.
Faudrié veni t'adurre aquelo pauro enfant;
La marcandejariés!... Que lou bon Diéu m'escrache,
Se te vènde jamai l'enfant qu'ai fa teta!
I'a que tu pèr faire un tau pache...
Lou tron de Diéu te cure, o vièi sarro-pata!
Courduro, sènso pauso, an! courduro, mignoto;
As rèn dourmi: se pos, faras un som deman.
Toun paire es tant malaut ti sorre tant pichoto!
Nous rèsto plus que tu pèr acampa de pan.
Mouriras, se lou fau ma chato, dins toun caire;
Se lou fau, mouriren tóuti, à toun cousta...
Voulèn rèn de tu, laid manjaire?
Lou tron de Diéu te cure, o vièi sarro-pata!
Aucun commentaire:
Enregistrer un commentaire