La Poumo d’amour
Rèn que de n’en parla, me vèn l’aigo à la bouco!
Oh! la poumo d’amour! Quinte presènt de Diéu!
Que i’a de mai goustaous e de mai agradiéu
Qu’aquéu fru rouginèu de quau lou Nord se mouco?
Quand n’en mange, Messiés, me fau lacha la bouco.
Se n’i’a que l’amon pas, vous assegure, iéu,
Que soun pas de Prouvènço, e que vènon, mourbiéu!
D’ounte s’es jamai vist d’óulivié, ni de souco.
Qieucho emé de merlusso o bèn de cambajoun,
Fregido emé d’aiet, farcido em’ un rougnoun,
Disès-me, groumandoun, s’aquéu bajan resquiho!
E dison que s’es vist Esaü vèndre, un jour,
Ai-las! soun dre d’einat pèr un plat de lentiho!
Quau saup ço qu’aurié fa pèr de poumo d’amour!
Auzias Jouveau
.
Aucun commentaire:
Enregistrer un commentaire