Tóuti li legèire de l’album « Lou scètre d’Ottokar » d’Hergé, counèisson bèn la Sildavìo, « lou reiaume dóu pelican negre ». Quau, demié éli, s’es pas demanda ounte lou dessinaire èro ana destousca aquesto bèsti simboulico pèr n’en faire l’emblèmo d’aquéu païs imaginàri. La responso s’atrovo en Belgico que sufis de vesita si glèiso pèr s’avisa qu’aquest aucèu i’es representa de pertout. Lou tintinoufile que siéu coumprenguè acò quouro descurbiguè, estabousi, que lou mèstre-autar mouderne de la catedralo Sant Michèu-Santo Gudulo à Brussello èro fa d’uno taulo de vèire repausant sus dous pelican d’aram.
Segound uno legèndo forço anciano, lou paire pelican, s’un cop atrouvavo si pichot mort dins lou nis, s’estrassavo lou flanc emé soun bè e lou sang que raiavo de sa blessaduro li reviéudavo. En lis engendrant d’abord, pièi en li fasènt reveni d’emé li mort, lou pelican èro ansin dous cop paire, coume l’es Diéu pèr nous-autre. Autambèn lou pelican venguè lèu un simbèu dóu Criste que pèr soun sang nous purifico, nous douno la vido, nous nourris dins l’eucaristìo. Pèr-ço-que i’a ges de provo d’amour mai auto que de vueja soun sang pèr sis ami, lou pelican represento tambèn lou degrad soubeiran de la carita. Mai d’un prelat prenguèron un pelican dins si armarié, coume lou cardinau Lavigerie archevesque d’Argié e de Tunis, primat d’Africo, au siècle XIXen. Vuei es Mounsegne Bernat Ginoux, lou nouvel evesque de Mountauban, que porto un pelican sus soun bel escut d’armo. L’animau adourno peréu soun bastoun pastourau.
Alan Costantini
Aucun commentaire:
Enregistrer un commentaire