Clovis Hugues : A Vitour Gelu - 1906

.




1 - Gelu, i’a deja cènt annado,
Emé sei flour dins lei bèu mes
Que, sus ta bouco, l’alenado
Venguè pèr la proumiero fes;
Cènt an, que souto lei parpello
Tei dous uei, buvèire d’estello,
S’esbrihaudèron d’un trelus
E que la maire benesido
Ausiguè douçamen la vido
Canteja dins toun pitre nus.

2 - Mai que t’enchau lou tèms que passo
Nous matrassant l’amo e la car?
Siés inmourtau coumo la raço,
Lou vènt, la mountagno e la mar!
Tei cansoun de bèu pantaiaire
Vouelastrejant de tout caire
Dins lou soulèu e dins l’uiau,
Tant que blanquejaran lei velo
Sus l’aigo bluio e clarinello,
Tant que boufara lou mistrau.

3 - Ço qu’empachara ta memòri
De toumba, moucèu pèr moucèu
Ço que ti courouno de glòri
D’an e d’an souto lou grand cèu
Es d’agué bressoula teis alo
Dins l’èr de la terro natalo,
Sènso agué l’esfrai de la mort,
Sèmpre au mitan de la lumiero,
Coumo lei passeroun sus l’iero,
Coumo lei gabian dins lou port.


4 - E tambèn d’agué pèr Marsiho,
Ardènt, galoi e pietadous,
Cueihi coumo ‘no grando aleto
Lou mèu de tóutei nòuestei flous,
D’agué dins leis envanc de l’ouro,
Celebra ço que ris vo plouro
Dins la naturo e la ciéuta
E, maugrat darboun e coulobro,
D’agué basti touto toun obro
Emé de troué d’umanita.

5 - Es surtout quand l’or voula briho
Ei det ferouge dei gusas
D’agué canta pèr la pauriho
Lou vin, lou soulèu e la pas,
D’agué tout de long de la draio
Emé lou pople que travaio
Parteja lou pan de l’amour
E d’agué, dins la bello voio,
Vueja quàuquei gouto de joio
Sus lei labro de la Doulour.

6 - Poudiés, o Gelu, bèu troubaire,
Coumo tant d’autre, mespresa
La santo lengo de ta maire,
La cansoun que t’avié bressa,
La siavo musico latino,
Puro coumo l’aubo divino,
Coumo l’eternalo bèuta
E que sèmblo, souto la fuèio
Lou brut d’uno pichouno plueio
Facho de perlo e de clarta.


7 - Lou front aut, la man sus leis anco,
Lou gardères lou parla dous,
Coumo lou nis gardo la branco,
Coumo un Bretoun gardo sa crous,
Coumo la cimo inmaculado
Gardo apèr-amount, luen dei piado,
La blanco nèu en plen estiéu,
Coumo l’astre gardo sa flamo,
Lou pescadou sa boueno ramo,
Lou pastre corso soun fusiéu.

8 - Poudiés, coumo tant d’autre encaro,
Ana de tei det ufanous,
Faire vounvouna la guitaro
Dins lei saloun, pèr leis urous,
Parpaiouna davans lei damo
Li coutiga lou pitre, l’amo,
Emé l’alo dei madrigau
E souto la couelo sacrado
Li trena, coumo pèr de fado,
De vilanello à faire gau?

9 - Aimères miés, valènt cantaire,
L’esquino drecho e leis uei clar,
Viéure la vido de tei fraire,
Davans la bèuta de la mar,
Escouta sus sei bouco sano
Lou poulit brut de joio umano
Qu’en i vouelant fasié toun noum,
Estre libre, sauta lei cledo
E l’estiéu, souto la pinedo,
Aussa toun vèire au cabanoun.


10 - De la Majour eis Eigalado,
De Sant-Jan à Sant-Barnabè
Ta grando plumo ensoulihado
Agué tout Marsiho à soun bè,
Lou pople emé la poupulaço,
Lou nèrvi que fai sa radasso,
Lou peissounié suto soun banc,
Lou pescadou, crestian candide,
E souto sei boutèu soulide,
Lei Tur coueifa de soun turban.

11 - Emé la bounta sus ta faço,
Sèns t’enfebra pèr lou Lausié
Cantères touto ta vidasso,
Dintre tèms que l’aubo risié;
Diguères lei gus, leis arlèri
Leis endiabla que fan l’empèri,
Lei sènso-pan, lei mau luna;
E ta lengo tant forto e claro
Quand lou fouguè, dins la bagarro
Tambèn la faguères trouna.

12 - Es pèr acò, Gelu, bèu rèire,
Que sus toun aima pedestau,
Lou pople es revengu ti vèire,
Dins toun triounfle centenau,
Que t’adusèn de margarido,
Que ti cantant, l’amo ravido,
E que lou vènt cantant peréu,
Ti fa, dóu Vièi Port ei calanco,
Saluda pèr lei velo blanco,
Suto la mar e dins lou cèu.

(Le Petit Provençal -
doù 9 d’óutobre de 1906)

Embrun, lou 1é d’avoust de 1906, pèr li 100 an de la neissènço de Vitour Gelu

.