P. Amargier : Franz Mayor de Montricher

.

Franz Mayor de Montricher

Despièi de tèms, Marsiho assousto lou sèti dóu Counsèu moundiau de l’aigo. Bello situacioun de capitalo pèr Marsiho, à l’ouro que, lou sabèn proun, li targo pèr l’aigo van deveni un enjò mage dins lou mounde. Nosto bono vilo dèu aqueste privilège à-n-un ome que devèn saluda coume un di grand de nosto pountanado : Franz Mayor de Montricher.
Tiravo racino de Morges (dins lou cantoun de Vaud, en Souisse), mai se devino pamens francés, bord que lou 19 d’abriéu de 1810, jour que neissiguè, aqueste païs elveti èro pas que lou despartamen francés dóu Mount-Blanc, counquista pèr Napoléon.

Soun paire èro vengu planta caviho à Marsiho en 1823, lou fiéu venguè emé lou rèsto de la famiho tres an après, pèr lou retrouba e presenta lou councous de l’Escolo Pouliteinico que capitè tout d’uno. Maudespié sa jouinesso, faguè d’estùdi de proumiero e sourtiguè de l’Escolo dins li proumiéri plaço. Pousquè ansin causi li Pont e Caussado. Dins aquesto darriero istitucioun faguè tres an de tèms d’estùdi e restè sèmpre dins li proumié. Capitè lou councous finau coume majour de sa proumoucioun.
Lou nouvèu diplouma aguè uno vido proufessiounalo di mai esbléugissènto. Coumencè de travaia en 1831, e acabè sus li ribo dóu lau Fucino, proche de Naplo, en 1858. Avié pas que 48 an.

Fuguè à soun trelus, quand capitè de realisa lou canau que devié mena lis aigo de Durènço fin qu’à Marsiho. Entrepreso espetaclouso qu’avié decidado lou municipe Consolat, en 1834, quouro la vilo s’anequelissié dóu manco d’aigo.
Ié fauguè quatre an d’estùdi à Montricher, pèr alesti soun proujèt dins lou menu. L’obro fuguè coumplido quouro l’aigo arribè dins lou bàrri marsihés de la Gavoto, lou 8 de juliet de 1847, restavo plus alor que de la mena fin qu’au cèntre de la vilo; lou gros dóu travai èro fa.

Mai pèr èstre digno d’aquelo obro mage, l’arribado se devié d’èstre mounumentalo. Vai ansin qu’Enri Esperandieu maginè lou meravihous Palais Longchamp, castèu d’aigo coume pas un, font majestouso emé sis aigo que cascaion entre lis esculturo, li jardin e li museon e que fuguè inagura lou 15 d’avoust de 1869.

Uno obro pariero fai vuei, e fara encaro deman, la glòri de l’ingeniaire de Montricher que lou bicentenàri de sa neissènço capitavo en 2010. Lou falié pas manca de saluda !

Nimai l’architèite Esperandieu.

P. Amargier (PB)

.