.
Heribert Barrera vo l’integrita
Lou baile pouliti istouri sud-catalan Heribert Barrera, Sòci dóu Felibrige e Presidènt d’ounour de l’Assouciacioun Internaciounalo de Defènso di Lengo e Culturo Menaçado (A.I.D.L.C.M.), defuntè lou 27 de juliet 2011, dins si 94 an. Nascu à Barcilouno en 1917, aquesto persounalita dóu siècle XX, fuguè, de 1980 à 1984, lou proumié presidènt dóu Parlamen de Barcilouno, un cop l’autounoumìo retroubado après lou franquisme. Fuguè pièi elegi deputa éuroupen.
L’avèn couneigu tre 1978, quouro l’AIDLCM tenguè soun coungrès dins la Catalougno liéuro e autounomo. Venguè en 1983, coume Presidènt dóu Parlamen, pèr adurre éu-meme la Coupo catalano à Perpignan. Proumié rescontre di dos Coupo en l’ounour de la Mantenènço de Catalougno reviéudado. Un pau avans, aviéu agu la joio de la vèire, aquesto Coupo dins soun recate dóu Menistèri de la Culturo sus la Rambla Santa Mounica. Un souveni esmougu.
Heribert Barrera èro tambèn un di baile dóu IIen Coungrès de la Llenga catalana en 1986. Erian noumbrous, li felibre, de ié participa, un pau espanta davans un tal estrambord e tant de recepcioun óuficialo pèr l’aparamen d’uno lengo. Souspreso e regrèt pèr nautre...
E coume óublidarian li rescontre un pau de pertout en Europo, mounte Heribert Barrera e Pau Pons amavon de ramenta e de nous counta li grand moumen istouri dis annado 1930 qu’avien viscu parié tóuti dous. E coume óublidarian li vesprado amistouso à l’oustau e soun gentun pèr mi gènt ?
Heribert Barrera avié fa d’estùdi de chimìo e ensignè à l’Universita de Barcilouno avans de se counsara en plen à SA Catalougno. Rintrè en poulitico à 17 an e marquè soun parti pèr de desenau d’annado (l’Esquerra Republicana Catalana). Sa vido fuguè touto counsacrado à la Catalougno, à si liberta, à sa soubeiraneta e à sa lengo. Vèn d’acò que fuguè pèr nautre un ami e que dèu resta pèr tóuti un moudèle.
Uno de sis amigo nous escriéu sa tristesso e tout de long de sa letro tournon li mot d’umanita, de coumprenesoun, de sapiènço, de saviesso e mai que mai d’integrita. Un óumenage à l’ome fort que sabié sousteni lis autre fàci l’aversita e ié douna lou sentimen que falirien jamai, que restarien fidèu à soun ideau, sènso jamai trahi ni manca à sa paraulo.
Em’éu li catalan troubavon estrambord, roumantisme, generouseta, sacrifice, sèns, passioun e voio pèr ama sa terro emé grandour e digneta. Heribert Barrera èro pas l’ome di grand discours mai dis ate councrèt, de l’eisèmple. Un pensaire plen d’umanita, escouta e ausi. Eisigènt pèr éu tant coume pèr lis autre, amavo miés de faire si discours à l’estrangié en anglés pulèu que de parla castihan, ço que i’aurié sembla d’èstre uno trahisoun.
Un fuble de persounalita ié rendeguèron óumenage e tóuti li media d’Espagno faguèron resson d’aquelo despartido. Coume nous l’escriéu Carme Carmona : « Us regracio, us regraciem la vostra llavor, el vostre llegat de coratge, la vostra sinceritat, la vostra lleialtat, la vostra amistat, el vostre mestratge. El vostre exemple d’home integra resta i restarà en cadascú de nosaltres i en les contrades més llunyàries ».
La Catalougno a perdu un grand ome. Lou Felibrige e tóuti lis aparaire di lengo regiounalo an perdu un ami, un soustèn, un moudèle.
Peireto Berengier
.
Aucun commentaire:
Enregistrer un commentaire