Peireto Berengier : Tourisme e vigneiroun en Prouvènço

.

Tourisme e vigneiroun en Prouvènço

Un journalisto, un especialisto di vin, un guide... Me dirés que tout acò’s pas nouvèu. Que si que l’es !

Lou journalisto, ié dison Luc Poulain d’Andecy e se devino lou fiéu de Louis d’Andecy d’Aigo-morto que n’en legissèn souvènti-fes lis article. Aquéu Lu Poulain d’Andecy, journalisto dounc e especialisto di vin, nous vèn de pourgi un guide pas coume lis autre.

Proumié, lou vin se bèu mai i’a pas qu’acò. Un vin es liga à-n-un païs, à-n-uno culturo e tout acò lou fau faire parteja. Sufis pas que li touristo croumpon de vin, fau tambèn que sachon quete vin, de quete terraire e tout ço que fai l’èime d’aquéu terraire.

Pèr faire parteja soun saupre, Lu Poulain d’Andecy presènto li causo en francés e en anglés, la lengo óubligatòri... Pèr faire counèisse lou terraire e soun èime, aguè l’idèio chanudo de i’apoundre la versioun prouvençalo (es lou papa que se ié groupè...). Em’acò, en mai di vin, de si qualita, dis adrèisso (croti, vesito, restaurant, etc.) e de tout ço que fai un bon guide, dins aquéu atroubas nosto lengo, Mistral, lou Felibrige, lou cant de la Coupo (emé sa reviraduro en anglés), d’esplico sus lou drapèu, la grafìo e bèn entendu tout ço qu’esbarlugo li noun inicia emé lou voucabulàri talamen especiau dis éunoulogue, li nas, li redoulènci e àutri mistèri. Tambèn tout lou ciéucle de la vigno que li touristo de Loundro au Japoun, n’en sabon belèu pas proun.

Adounc, 47 pajo trilengo que meton nosto lengo e noste païs à l’ounour dóu mounde e mai que mai que broumejon, coume dison li pescadou, dins de mitan nouvèu que de segur couneisson rèn de tout acò. 300 pajo au toutau emé tout ço que fau pèr la pratico e lou plasé, mai de 500 vignoble e tout ço que fau vèire à l’entour.

Talamen que l’idèio èro bono, vaqui pas que li vigneiroun lengadoucian volon lou siéu ?!... E coume sara escrich aquéu ?

Un guide precious que vous fau espandi. Cadun ié trouba vin à soun goust, de la Vaucluso i counfin dóu Var, de la Camargo enjusqu’i terro auto que la vigno la vigno ié vèn. De vin, en Prouvènço, n’i’a de touto meno, pèr tóuti li goust e tóuti li bourso.

Peireto Berengier

Guide: Tourisme et vignerons, de Luc Poulain d’Andecy, Ed. SARL tourisme et vignerons, 40 allées des frères GRIMM, 34070 Montpellier.
(Costo 17 éurò)

.