Peireto Berengier : Qu’es acò l’Aiòli ?

.

Qu’es acò l’Aiòli ?

Marsyas 2 èro pancaro endraia quand Sabino Barnicaud, la counservairis dóu Palais dóu Roure d’Avignoun aproufichè de la pountanado d’estiéu pèr esplica i touristo e is autre, ço qu’es « L’Aiòli ». Noun pas noste aiòli pèr la merlusso mai lou journau de Frederi Mistral emé soun poulit titre ilustra pèr Burnand. Uno mostro espetaclouso.

Lou Palais dóu Roure, que soun noum tèn sa poupularita dóu journau, vèn de reculi de mètre cube d’archiéu que tóuti li cresien perdu. La famiho de Montgolfier, de felen dóu Marqués, vèn de n’en faire presènt e soun tourna dins l’oustau de soun rèire que beilejè lou journau souto l’empento de Mistral de 1891 à 1899.

« L’Aiòli » pareissié tres cop lou mes (li 7, 17 e 27) e publicavo li meiours escrivan de Prouvènço. De Mistral à Devoluy, de Batisto Bonnet à Savié de Fourviero, de Roumanille à Fèlis Gras e de centenau d’autre. Sufis de vèire la taulo dóu journau pèr s’espanta de tant de travai, de tant de voio e de tant de talènt.

_______

Chivalié de la Rèino Jano

Ero un journau independènt de tóuti li parti que se dounavo pèr toco d’apara lou Miejour, si coustumo, sa lengo, si tradicioun e sis interès. La toco memo dóu Felibrige. Mistral disié dins soun buletin de presentacioun que sarié lou chivalié de la Rèino Jano e de la Bello Magalouno ! Mistral lou voulié pas un journau felibren, bord que n’i’avié deja e que falié touca tout lou mounde.

De fuietoun, de pouèmo, de conte, d’article istouri, literàri, pouliti (au bon sèns dóu terme), de reviraduro, d’anóuncio, d’article d’atualita, etc. Tout acò, en prouvençau e rèn qu’en prouvençau, debutè lou 7 de janvié de 1991, pèr l’anniversàri dóu restacamen de la Coumtat de Venisso à la Franço.

« L’Aiòli », coume « l’Armana Prouvençau » s’espandiguè e faguè grando pèr la proumoucioun de nosto lengo e de nosto culturo. Mai lou Baile, lou Marqués Folco de Baroncelli, partiguè en Camargo e i’aguè forço proublèmo de coumunicacioun entre Li Santo e Avignoun.

_________
L’epoupèio

En 1975, dins lou tome VII di « Memòri de l’Acadèmi de Vaucluso », Farfantello, countè aquelo epoupèio emé de persounage coume Marius André, Fourtuneto (vèire l’aficho), Marìo Gasquet, Bouvet, etc. Countè coume Baroncelli beilejavo lou journau emé negligènço, coume un pouèto pantaiaire que perdié lou caièr di comte long de la routo di Santo…

Li proublèmo se multipliquèron emé lou mounde que pagavo pas lis abounamen. Fèlis Gras, alor capoulié, roumpè busqueto, e coumpliquè encaro mai li causo. La famiho Baroncelli se desvouè tant que pousquè mai, en 1899, l’estampaire Seguin avisè Mistral dóu trau que i’avié dins li finanço… Lou tirage avié deja passa de 4000 eisemplàri à 800, tre li proumiéris annado. « L’Aiòli » s’acabè (faudra pièi, espera la fin dóu siècle XX pèr retrouba un journau regulié tout en prouvençau). Mistral tapè lou trau mai fuguè grand tristesso pèr éu e pèr Folco de Baroncelli ; Mistral escriguè alor : « C’est folie pure de faire tant de sacrifices dont personne ne nous sait gré et de battre l’eau avec un bâton. Travail de niais 1». Un siècle plus tard, nautre ié sabèn grat. Si sacrifice soun pas esta inutile. Que sarié vuei, se « L’Aiòli » nous fuguèsse esta edita e se n’avian si couleicioun tant preciouso ?

Es tout aquelo istòri que Sabino Barnicaud a sachu faire reviéure emé de tablèu, d’óujèt, de fotò, de carto poustalo, de journau, de manuscrich e àutri doucumen coume la faturo dóu n°1… Mai lou mai esmouvènt rèsto belèu lou manuscrich autougrafe de Frederi Mistral « l’istòri (inedicho) de la Revoulucioun dóu Coumtat de Venisso » que la vilo d’Avignoun aguè la bono idèio de lou croumpa quand passè is encan !

Aquelo espousicioun rèsto dins li memòri e lis archiéu que ié figuravon soun toujour au Roure ounte se podon counsulta.

Peireto Berengier

1- cita pèr Farfantello Memòri de l’Acadèmi de Vaucluso, TVII

.