Lou jour e la nue, lou sero e lou matin, l’ivèr e lou printèms van e vènon; lou tèms varaio, l’àgi passo, mai inbrandablo l’espero nous soubro, la verdo e bello espero. Lou cors s’anequelisse, la tèsto si pelo, la bouco pèrde sei dènt, lou bastoun s’amarino souto a man, e pamens l’ilusien, l’ilusien dóu desir noun s’esvano.
************************
Lou brès
Lou brès 'me d'estrass apaia
Pausa sus doues cadiero goio,
Varaio e fa que gansaia
— Moun couar! moun amo! ma ninoio!
Caudo de la calour dóu cors,
Dedins la vèsto de soun paire
An fagoutia lou bèu tresor.
— Moun bèu! coumo as lou souom plouraire!
Puei l'an tapa d'un vièi caban
D'ounte just souarte la testeto
Coumo uno flour de tulipan.
— Ne-ne, souom-souom, bello nineto!
Lou paire, alassa dóu travai,
Douarme au brut dóu brès que craniho,
Que vai e vèn, que vèn e vai.
— Ma vido! ma couco! ma fiho!
E ris eis àngi, l'enfantoun,
Sèmblo lou jèsus sur la paio,
E brando pas mai qu'un santoun.
— Ne-ne souom-souom, ma bello caio!
Tout ço que pòu si souveni,
La maire li lou cansounejo:
Lou pichoun ome va veni.
— Ah nino! toun uei parpelejo!
Lou brès s'en vai balin-balan.
Au balans fermant sei parpello
L'enfantoun s’endouarme plan-plan.
— Ne-ne, souom-souom, ma couco bello!
Dins soun pantai s'es envoula
Au paradis de l'enfantiho
Plen de béllei pousso e de la.
— Chut! ges de brut! l'enfant soumiho!
Valère Bernard.
Aucun commentaire:
Enregistrer un commentaire