jeudi 18 juin 2015

Pujol : JANO E JANOU - TINDETS







JANO E JANOU 


TINDETS 





I. — ERON NESCUDIS DOUS. 
II. — LES BESION JITA ROCS. 
III. — LA 'SCOLO LES PRENIO. 
IV. — LE FOC DE MOURTAIROLS. 
V. — COUMO'S POULIT LE JOUN. 
VI. — T'AG PROUMETI JANOU. 
VII. — LA FLHOU DE NAUSENO.  
VIII. — LA MORT DE JANOU. 
IX. — BEIRETS QUE TOURNARA. 



 I. — ERON NESCUDIS DOUS 


Eron nescudis dous la mèmo maitinado  
Dins le petit quartiè del pas del Besinat  
E le noum de Janou al goujat fec dounat  
E la filho sulpic fec apeihado Jano! 

Chi nou se brembaro d'aquelho batejado?  
Le barri tout entiè se bejèc coubidat  
Aude manja, dansa, picoula l'bi mercat.  
Tout aco se passèc un bèlh joun de tourrado. 

Les dous efants durmion dins le mèmo panhiè  
Qu'abion troubat desat al coinh d'un bièlh granhiè  
E qu'abion counfiat a la brabo Bergèro. 

Janou, le punh tampat, fasio le risounet,  
Jano chucabo l' digt, le qu'abio pichounet.  
Poulou boulio jouga “Polka de la granhièro”.  




II. — LES BESION JITA ROCS 


Jano se demourèc sajo coum' un' imaje.  
Janou benguèc pus grand, pus fort, pus trapelhur.  
Les besion jita rocs ou siègue le pourtur  
Ou bouida les bassis a trabès le bilatge. 

Elho j'abio lhèu pöu, mès elh ande couratje,  
Enca que les mecut mè deja bataihur,  
En pilhan tout le blhat del paure Percurur  
Seguio le sinsoulam a trabès la farratje! 

Prou suen, ja se perdion dins un gros migroussa:  
— Anèit plha, s'en biran al lhèit sense soupa! 
Qu'abèn fèit al boun Diu? Tchèsus, chuno canhièro!  

Mès elh, quand èro 'chi, deja en soumiadis,  
Rebabo de boula, d'ana beire pais...  
Janou pujabo 'l cèl, sietat sus la granhièro! 




III. — LA 'SCOLO LES PRENIO 


— Le soulelh es a Trounc, aprestats-bous, efants,  
Le regent ba souna! se disio la Menino.  
E Janou respoundio: — Porti l'cartou de Nino.  
La 'scolo les prenio: benion d'abe cinq ans. 

A la filho, sus l' cap abion mes dous ribans  
E le goujat, crentous de la beire ta fino,  
Prenio tout douçoment la ma de la besino:  
— Nano, couito te dau, que nou-s prengon les bans!  

Las oumbros als Sarrats, sus fi de la brespado,  
A l'ouro del brespalh manjabon la croustado  
Abant de s'en ana rouda pel besinat. 

E tout'n derouselhan las camos engourdidos,  
Janou, al bort del nu, sus l' tard fasio courridos  
E Jano le seguio, le nas tout regussat. 




IV. — LE FOC DE MOURTAIROLS 


E les ans an passat, les jouns e las sasous.  
L'ibèr tourno beni, menan la nèu tourrado.  
Janou, tout'n alhisan, passo sus la lhampado,  
Ou fa caire dels tets les grossis candelous. 

Tout le tems a routa, caussat ande guetous,  
N'aturabo pos mès de prene las fitados.  
Uno coco de nèu despalho las coufados?  
Tio bè! Petit malur! disio l'èlh amistous. 

Quand la primo benio e qu'èron uno colho  
Se munion d'un tecou, fasion la tento folho  
Ou, trucan sus un broc, sapabon fiutarols. 

Enlha, sus l' mes de mai, demèts las seguels nautos,  
Se dounabon la ma, pöu de las paparautos,  
Ou fasion brandeja le foc de mourtairols! 




V. — COUMO'S POULIT LE JOUN 


L'estiu e sa calou, l'auta, la soulelhado,  
Fasion al grand Janou un plhase sans parèlh.  
Quand les sibis simbouls partion cap al Plhanèlh,  
Sulpic on auseichio de Jano la bacado. 

Le bestia barrejat demèts la rousalado,  
Elhis partion al bosc cerca le nits d'ausèlh  
Ou manja coulindrous, ou beure and'un canèlh  
A la petito fount dins le talh amagado. 

Elh, menabo Jano pr'aquelh cami perdut  
Que passo sus l'acri dijous l'abet pelut  
E s'en ba cap al Roc emboustit de brumado. 

Elho, brasses plhenis de flhous des aberdalhs,  
Disio, tout'n se gaitan les mounts e les timbals: 
— Coumo's poulit le joun e courto la brespado!  




VI. — T'AG PROUMETI, JANOU 


— Nano, diguèc Janou, bau debeni souldat..  
Aro m'en cal ana, douma siras souleto...  
Le miu cor s'es sarrat per tu qu'ès ma paureto,  
Mè de beire pais m'a bèlh cop agradat. 

Dous ans, ja's plha bertat, sira bite passat.  
Toutjoun me brembarè de la mibo Janeto.  
Tabe, demoro me, ma petito flhoureto,  
Aci ja tournarè sense que sio cansat! 

Apèich, se Dius ag bol, tu siras la miu fenno  
E se me dises o, n'aurè pos cap de peno: 
Nous pouiren manda talhèu que tournarè.  

Jano, qu'abio las mas sus l' casabè juntados 
I respoundèc sulpic, cilhos amoulhegados: 
— T'ag proumeti, Janou, ja te demourarè!  




VII. — LA FLHOU DE NAUSENO 


Ba fè tres cops deja qu'an dalhat a la Prado  
Desempèich que Janou s'en es anat souldat.  
Sa Maire b’ag a dit qu'elh abio rengatjat,  
Qu'èro partit plha lhènh ande la siu armado. 

E Jano, cado joun, sus fi de maitinado,  
Demoro le pourtur; belhèu qu'aura pourtat  
Noubèlhos del besi: s'es en bouno santat...  
Mè las semmanos ban: Janou l'a debrembado! 

Pourtant, a la sasou, quand ba beire l'agal,  
Amasso cado pic arrans un gros timbal  
Uno flhou qu'espelheich, que se durbeich a peno: 

E escriu a Janou: — Aci, tout ja ba plha.  
La tiu gousso, pr'aco, ja senlho s'anuja...  
Ieu, t'emboï dos flhous qu'è troubat a Nauseno!  

 VIII. — LA MORT DE JANOU 


Sa Maire del souldat a recebut le mèro.  
Ja pareich qu'a pourtat le decès de Janou  
Que se siro passat un joun de la tardou  
Dins un espital blhanc d'uno lhentano tèrro. 

Doulou d'uno mama qu'a tout moument espèro  
Rebeire l'siu goujat, i bailha dous poutous,  
Tourna 'usi la siu bouts, soun rire, sas cansous,  
E s'apua sus elh, se requinca, plha fièro! 

Tabes aquelh efant a boulgut bouiatja  
Trasteja caut ou fred, apèich malauteja,  
Beir'un autre pais que le pas d'Engabarro! 

La noubèlho sulpic ganho le bort del riu,  
Mè Jano calmoment bol pos lheji l'escriut:  
— Aco n'es pos bertat, Janou ja biu encaro!  




IX. — BEIRETS QUE TOURNARA 


Jano desempèich tems a pres la tempo griso  
Mè l'siu cor es toutjoun, joube plhe de Janou  
E sus l'èlh atristat e cargat de douçou  
Un' oumbro qualque cop passo coumo'no briso. 

Ja s'en pod fuje l' tems, chès elho res n'a preso: 
Le camp e l' farratjal, le prat e la maisou  
Tout es entretengut ande que fass'aunou  
Al Janou que bendra un maiti de fiereso. 

A l'ento de soupa, se la besèts ana  
Se sieta sus un roc al pas de la Rauna,  
Es pos coumo cresèts ande se fè la punto... 

Mè Jano ba brouca e demoura Janou:  
— Beirets que tournara e que fara la junto.  
Ja se pod que sio 'chi abant que sio Martrou!  



# # # # # # # # # # # # # # 




Aucun commentaire: