BATÈSTO EN MAR
La grando mar lasso amaiso sous cants, e coumo un miral s’aplano, lusènto.
L’aire de Diéu, siau, de l’aubeno urous, a vesti de joio soun blu qu’esbaubiho.
Per pas treboula la Pas majestouso las ouros amount an baissa caquet.
Lou batèu francés, as sournes canous, pico ‘no dourmido, l’esquino au sourel. De sa chaminèio un fum tranquilas en flocs flèumarèls s’enauro e virunlo; mè de soun peitrau, l’arderous ressoun que brounzino, sour, rènd carn de galino.
Sus la planco, d’aut, un gueitaire, uscla, sans pauso ni fin braco sa luneto: dau nord, dau trelus, de l’avès, d’avans, furgo, atenciouna, la mar de traitige; e lèu un charpin peso sus soun sup, segne vertadiè que quicon l’angouisso.
Subran, lou gueitaire, a cluta, ferni!... (oh! n’es pas de pòu mè de grando joio!) vèn de vèire ailai, pas à vint courdèls l’orre souto-marin, requin d’Alemagno... E tant lèu, de-bas, per lou porto-voues crido :
- Barro au Nord! Lèste ou bèn sautan!
Tal un lioun fol, lou batèu susprés crucis de pertout, — brave tourpihaire; — sirènos, vapous, cadenos, siblets, tout ourlo, bregous, dins las machinassos;... e nebla de fum, part coumo l’eliéu...
Garo lou tabà!...
Ris, la mort, que guèito.
Veguènt lou Francés, lou Bocho-Requin, dins l’aigo escoundu, lanço soun veret, que, pounta bèn dret vòu tout esclapa...
Mè lou Franceset, prounte à lou para, glisso d’un escart, pièi de tout soun vanc pico franc lou Bocho, ié laurant lou rable.
Escrapouchina, dins lou toumple amar lou traite Alemand per toujour cabusso!
Boudifletos d’èr, es tout ço que vèi lou Francés, mouquet de soun esplet mèmo!...
Tabò! matelot!
Per Franço d’abord!
Per quand tournaras, trenan de courounos.
Aucun commentaire:
Enregistrer un commentaire