SENT JAN
TINDETS
I. — SENT JAN BENGUT.
II. — LA LHENHO S'EMPIELOTO.
III. — LA NEIT SE BA TAMPA.
IV. — LA PATS TOURNO BENI.
I. — SENT JAN BENGUT
L'estiu es arribat: deja la sin calou
Fa creiche dins les prats la fresco joumberdasso.
Les lhusentis babots, dins la pared pus basso,
S'arremasson a dous ande fè mès plharou!
Tabes, Sent Jan bengut, le que s'en ba pastou
Pelo le trounc d'un bès ount a nisat l'agasso
E coumo pescalhous bouto las pèlhs amasso
Ande las enfurga pel cap d'un gros barrou.
Dins un coinh del granhiè ount se te la sibado,
La falho del goujat d'amagat es desado,
Ande que prengo l'plhec, es curbido d'un roc.
Lhèu sira le grand joun que i aura l'abrandado.
Alabets pels besis l'amistat es proubado
Ande touti's falhès que porton lhènh le foc!
II. — LA LHENHO S'EMPIELOTO
On bets arroussega le fach mal espourgat
Ou l'estèlho de bèr, ou la branco flhourido.
Per touti's carrièrous, talhèu l'albo lhusido,
Es le joun de Sent Jan que fèsto l'besinat!
Fagot al pourtanèlh ou pas debarautat
Anèit ja nous faram uno brando poulido.
Tout so que pod crema, le tems d'uno courrido,
Es recatdat sulpic e lhèu enfagoutat!
Al coustat de la fount la lhenho s'empièloto.
N-h-i a toutjoun un que dits: — Me n'as panat, Migoto
E las gents, tout'n pousan, asardon un cop d'èlh.
Per la Carrièro 'mount, quand passo la canhièro,
On auseich le besi que tampo la sin ièro:
— Aro n'è prou dounat, dèicho 'co, foc del cèl!
III. — LA NEIT SE BA TAMPA
La nèit se ba tampa e la plhaço negrejo.
Dins les èlhs de cad'un on bets lhuse l'estelh.
Deja, de l'espinas on aprocho l'calelh:
Le fum bol ana 'l cèl coumo chi berfulhejo.
Esclampeto l'abet quand le tisou brandejo.
Pèich, le poulit falhè tengut per un moustelh
Esclairo 's farratjals coumo faro l'soulelh
E fa fuje l'taichou pus esquiu quand plharejo.
Les joubis fan passa las filhos al rumat
E las brèsson un chic per dessus le cremat:
— Dèicho te fè, Marie, beiras que bendras grando!
Sens' abe cap de poù de se ruma 's guetous
Al fagot d'aberdalhs qu'aro mateich s'abrando
Janou le trapelhur rescoumpasso 's tisous!
IV. — LA PATS TOURNO BENI
Per la Campanho'balh ount le grelh fa musico
Le falhè plhé de foc fa roundèlhs de plharou
E trauco 's alentours ande la siu roujou:
On diro dins la nèit lhuno que s'esparrico!
L'escur se beu las gents: ne demoro pos brico
Arrans le gros brasiè qu'aro fa l'moudoulou.
Les esplhops del tardiè buton pel courredou.
Le bilatge s'adèrm a l'oumbro de la pico.
Le fum, s'arroussegan, s'en ba lhepa l'sarrat
E porto cap al bosc las audous de cremat.
Del cèl, en tourbejan, la darrèro belhugo
Cats e be s'apausa sus la crinal del tet.
Uno pèlh, tout d'un pic, jito le siu lhuquet.
La pats tourno beni e res pus nou fourrugo...
# # # # # # # # # # # # # #
Aucun commentaire:
Enregistrer un commentaire