à M. Jùli Salles, Pintre.
LA FIELAIRO
Lou sourèl espinchounavo
Dins la nèblo dóu matin,
E l’arounze dóu camin
Souto l’eigagnau brihavo.
Souleto sus soun taulié,
Uno fiheto fielavo,
E tout en fielant cantavo,
E tou en cantant disié:
Dins la nèblo dóu matin,
E l’arounze dóu camin
Souto l’eigagnau brihavo.
Souleto sus soun taulié,
Uno fiheto fielavo,
E tout en fielant cantavo,
E tou en cantant disié:
-Que siès urouso, iroundello!
Entre que l’aubo lusis,
Lèsto, sortes de toun nis,
Va vèire la flou nouvello,
L’aigo que couris, e pièi
L’aubre que dins l’èr escalo...
Se coumo tus avièi d’alo,
Save ounte m’envoularièi!
Entre que l’aubo lusis,
Lèsto, sortes de toun nis,
Va vèire la flou nouvello,
L’aigo que couris, e pièi
L’aubre que dins l’èr escalo...
Se coumo tus avièi d’alo,
Save ounte m’envoularièi!
Darriès aquéli mountagno
Que se perdon dins lou cièl,
I’a ‘n pichot oustau bèn vièl,
Tant vièl que l’èurre lou gagno,
Sa porto es pleno de grel,
L’estiéu de flou la decoro,
E, dins l’ivèr, lis angloro
Ié van béure lou sourèl...
Que se perdon dins lou cièl,
I’a ‘n pichot oustau bèn vièl,
Tant vièl que l’èurre lou gagno,
Sa porto es pleno de grel,
L’estiéu de flou la decoro,
E, dins l’ivèr, lis angloro
Ié van béure lou sourèl...
Sa vanado m’es bèn chèro,
L’aime bèn, car es aqui
Que dins moun brès ai dourmi
Souto l’alo de ma mèro.
Oh! l’aime emé tout moun cur,
Car lou prat que l’envirouno
E lou cièl que la courouno
M’an vist ploura de bonur!
L’aime bèn, car es aqui
Que dins moun brès ai dourmi
Souto l’alo de ma mèro.
Oh! l’aime emé tout moun cur,
Car lou prat que l’envirouno
E lou cièl que la courouno
M’an vist ploura de bonur!
Es aqui qu’anave vèire
L’anedo au bord di valat,
Causi, pèr se miraia,
L’aigo lindo coumo un vèire,
Aqui que, souto un bouissoun,
Anave segui lis astre,
Entèndre sibla li pastre,
O piéuta li passeroun...
L’anedo au bord di valat,
Causi, pèr se miraia,
L’aigo lindo coumo un vèire,
Aqui que, souto un bouissoun,
Anave segui lis astre,
Entèndre sibla li pastre,
O piéuta li passeroun...
Es aqui que pèr segado,
Jóusè, sus la fin dóu jour,
Me parlè de soun amour...
Iéu ère touto troublado.
-T’aime, t’aime, me disié.
E soun cop d’iuel me brulavo,
Ma man dins la siéu tramblavo,
E ma bouco sourissié...
Jóusè, sus la fin dóu jour,
Me parlè de soun amour...
Iéu ère touto troublado.
-T’aime, t’aime, me disié.
E soun cop d’iuel me brulavo,
Ma man dins la siéu tramblavo,
E ma bouco sourissié...
Alor, trouvavo la vido
Bello coumo un jour de Mai,
Lou sourèl brihavo mai,
La roso èro pus poulido.
Quand, lou sèr, Jóusè venié,
Bèn urouso me trouvave
Bello coumo un jour de Mai,
Lou sourèl brihavo mai,
La roso èro pus poulido.
Quand, lou sèr, Jóusè venié,
Bèn urouso me trouvave
D’un cop d’iuel que ié dounave,
D’un poutoun que me prenié.
D’un poutoun que me prenié.
Lou bonur duro pas gaire.
Lou miéune aguè lèu fini:
Pèr souldat Jóusè ‘s parti,
Ma maire es morto, pechaire!
E iéu, liun de moun païs,
Laisse voula ma pensado
Vers moun galant à l’armado,
Vers ma maire au Paradis!...
Lou miéune aguè lèu fini:
Pèr souldat Jóusè ‘s parti,
Ma maire es morto, pechaire!
E iéu, liun de moun païs,
Laisse voula ma pensado
Vers moun galant à l’armado,
Vers ma maire au Paradis!...
Coumo moun cor hou z espèro,
Voudrièi revèire moun cièl,
L’oustau, lou prat, lis agnèl,
Lou cros ounte dor ma mèro,
E Jóusè qu’embrassarièi...
- Iroundello, escalo, escalo...
Se, coumo tus, avièi d’alo,
Save ounte m’envoularièi!.
Voudrièi revèire moun cièl,
L’oustau, lou prat, lis agnèl,
Lou cros ounte dor ma mèro,
E Jóusè qu’embrassarièi...
- Iroundello, escalo, escalo...
Se, coumo tus, avièi d’alo,
Save ounte m’envoularièi!.
- - -
Aucun commentaire:
Enregistrer un commentaire