L'Art e lou joug
Li joug, èro de bos travaia e asata is animau, li biòu proumié pièi li chivau, pèr lis atala en de cariolo, d'araire o àutris estrumen agricòu. Se poudien fissa au còu o bèn davans o darrié li bano pèr li biòu. Li joug de coutet èron mai espandi bord que coustavon gaire pèr li fabrica, qu'èron eisa de pausa e que leissavon uno grando liberta à la bèsti que s'alassavo pas tant. Li joug de bano èron utilisa qu'en Europo e se n'en retrobo dins tóuti li regioun de Franço. Soun mai à respèt di joug de coutet es que li bèsti en estènt estacado soulido l'uno l'autro, se menon mai eisa e riscon pas de s'embana.
Li biòu fuguèron li proumié d'èstre utilisa tre l'Antiqueta pèr travaia la terro. Li chivau, li meteguèron au travai pas qu'à l'Age-mejan. Prenguèron vertadieramen la plaço di biòu qu'au siècle XIX quouro li camin en se fasènt plus tant marrit ié pousquèron faire mestié. Vuei, segur que l'utilisacioun dóu joug a dispareigu. N'i'avié pamens encaro mai d'un milioun en Franço dins lis annado 1950, quand debutè la mecanisacioun. Se n'en vèi, encaro quàuqui un dins lou Miejour aqui mounte li terro soun trop pentudo o trop pichoto o que li restanco riscarien de s'afoundra se ié metien de gròssi mecanico.
Es dounc, malurousamen i paret o au plafouns di mas que vesès lou mai de joug à l'ouro d'aro, triste, que decoron o porton lume… Urousamen que soun pas tóuti degaia e lou Museon dis Art e Tradicioun Poupulàri de Paris ié caupié la plus grosso couleicioun de joug de Franço.
Vèn belèu d'aqui que Paris nous vòu teni souto sa jougato?
Aquéli joug fuguèron espausa i'a quàuquis an au Saloun Internaciounau de l'Agriculturo e èro bèn sa plaço. Ié vesinavon em'uno espousioun que se ié poudié vèire lis obro de trege artisto countempouran ispira pèr l'agriculturo. Lou tèmo d'aquelo espousicioun, la fermo e sa representacioun de tras lis art, moustravo clar que l'art nous toco tóuti de proche.
L'agriculturo, toustèms, ispirè lis artisto mai cade age sa modo. Dins l'Antiqueta, li fresco e bas reliéu simbouli representavon mai que mai la drudesso de la terro e li recordo mai gaire lou travai dis ome. Acò vendra d'à cha pau subre-tout emé Millet e Van Gogh. Vuei, l'agriculturo es en criso e lis artisto de vuei seguisson tambèn la criso, la modo e soun evoulucioun. N'en devon douna un image nòu, un image de vuei.
Peireto Berengier
*+*+*
Aucun commentaire:
Enregistrer un commentaire