J. Tellier : CADUN SOUN RENG

CADUN SOUN RENG

Mau-grat que la passièu, vencigue la fatiga,
S'avès tout un mati trepat per la garriga,
Coussejat lou lapin, courrit lou perdigal,
Lou pichot dejunà, deven un festival.
L'èr pur es perfumat d'espic e de frigoula,
La font fresca es aquis, al pèd de la piboula
Lou sourelh sourrisent, lou vent à l'apetis
E quaucun a cantat: Arresten-nous aicis!
Moument delicious, bèla oura benesida,
Ount l'ome un cop de mai, es erous d'èstre en vida.

Per lors un bèl mati, tout coum' acò d'aquis,
Se troubavoun, Janou e moussu lou Marquis.
Janou brave varlet, au plase, à la pena,
Trigoussava lou sac, la fura e la pantena,
Lou gibiè, quand n'i aviò, e n'èra tout erous,
E per lou dejunà, manjavoun toutes dous.
Lou Marquis vièl groumand, tout au mens bouca-fina,
Ensegnava à Janou, lous sicrèts de cousina:
Se vos de toun gibiè, n'en faire un fin regal,
Penja naut toun faisan, manja toun pèrdigal.
Un pares pla souvent, quand es fach amb' adressa,
A quicon qu'es essuch, pot dounà de finessa!
Acò, countinuèt, prenguent lou saucissot,
Se vos que siègue boun, cal que siègue minçot
Se vos que lou fumet perfume ta garganta,
Lou cal pas mai espes, qu'una pèça de cranta!
— Moussu, sousquèt Janou, parlas en proufessou!
Mes per ièu coumprenès, ie cal mai d'espessou
Cadun devèn manjà seloun nostre ben-èstre,
Lou varlet manja pas, tant boun couma lou mèstre!
— E lou brave Janou qu'èra pas mai que sot,
Se coupèt, sans paupà, tres dets de saucissot.

*+*+*