L Della Flora : St Louis au gabian
Sète - 2013 - copyright
UN AUTRE NOUVELUN...
Un autre nouvelun caresso lou campèstre,
E fai giscla li flour.
Mai la voio, moun cors, t’abandouno à grand dèstre,
E te perdes que mai dins la lus e l'amplour.
Quand auras couneigu, dins lou retour eterne,
Gaire mai de sesoun,
Toumbaras, abena, vers l'óublit sènso terme,
A tras lou tèms que duro e li causo que soun.
Gaire mai de sesoun,
Toumbaras, abena, vers l'óublit sènso terme,
A tras lou tèms que duro e li causo que soun.
Gaire enchau, cors pourri, que te mudes sout terro,
E remountes i jour
Dins la sabo de l'aubre o l'aigo que s'esmèro
E que lindo flouris i labro de l'eissour,
E remountes i jour
Dins la sabo de l'aubre o l'aigo que s'esmèro
E que lindo flouris i labro de l'eissour,
Se rèn de toun desir e se rèn de ti sounge
Ressuscito de tu,
Se de ta vido pauro e de toun court vieiounge,
A ges d'àutri parié, tout demoro perdu.
Ressuscito de tu,
Se de ta vido pauro e de toun court vieiounge,
A ges d'àutri parié, tout demoro perdu.
Car tout ome es unen; n'i'a ges dóu meme mole,
Ni dóu meme secrèt.
Sus lou bord dóu noun-rèn que toun amo tremole,
Incouneigudo meme au mai vèr di regrèt.
Ni dóu meme secrèt.
Sus lou bord dóu noun-rèn que toun amo tremole,
Incouneigudo meme au mai vèr di regrèt.
*+*+*+*
Aucun commentaire:
Enregistrer un commentaire