Alan Costantini, grand connaisseurs des "choses" de la Provence, s'essaie sur le géant de Provence. Montagne que les celto-ligures avaient dédié au Dieu Bélénos. Cet homologue d'Apollon règne sur la Vallée du Rhône est l'orne tel un écrin.
Lou Ventour misti(Mystique Ventoux)
Segound l’istourian Marcèu Brasseur, lou mount Ventour, coume d’aiours lou mount Ventùri proche d’Ais, tirarié soun noum de « vintur » (lou brihant) epitète dóu diéu Belenos, l’Apouloun di Galés. Quouro se bastiguè l’óusservatòri, à la fin dóu siècle 19en, li maçoun atroubèron, en cavant lou sòu pèr establi li foundacioun, un mouloun de clap de toutouro (pichòti troumpeto de terro), vestige belèu d’un depost voutiéu celti.
Li crestian prenguèron la plaço di pagan e bastiguèron à soun pounchoun un capello dedicado à la Santo Crous ounte se faguè, pendènt de siècle, un roumavage annau lou 14 de setèmbre. Devèn à Petrarco lou proumié raconte d’uno ascensioun à la cimo dóu « Gigant de Prouvènço ». Èro en 1336, avié enmena dins sa saco li Counfessioun de Sant Agustin e fuguè coumpletamen trevira en legissènt lou passage seguènt : « E lis ome van amira l’auturo di mountagno, lis oundado gigantesco de la mar, li làrgui bouco di flume ; mai penson pas à-n-éli-meme ». Pèr éu, acò fuguè la debuto d’uno counversioun.
Lou geoulogue e teoulougian proutestant Franz Leenhardt trevè lou Ventour pèr de resoun scientifico de 1875 à 1883. Soun cougnat, Aleissandre Westphal que l’acoumpagnavo dins sis esplouracioun, nous leissè d’éu aqueste retra seisissènt : « Lou geoulogue durbiguè soun Nouvèu Testamen, legiguè un chapitre de Sant Jan et preguè. Revese l’espressioun de sa caro apasimado que me dounè sus aquelo cimo lumenouso e sóuvertouso uno vesioun dóu Tabor. »
Lou 18 de setèmbre 2005, un roudelet de boudisto tibetan mountèron eilamount pèr auboura un quihet rituau (chörten). Dins aquesto escasènso lou cantaire Loten Namling, forço esmougu, prenguè la paraulo pèr dire : « Ai agu lou sentimen qu’es aqui que tóuti li energìo se recampon e qu’acò’s lou centre dóu mounde » . Aquéli temouignage mostron qu’uno escourregudo sus nosto « santo mountagno » se fai raramen de bado e que se pòu parla, pèr d’ùni que i’a, d’esperiènci mistico.
Aucun commentaire:
Enregistrer un commentaire