Federico García Lorca en prouvènçau

ROUMANSO SOUNAMBULO

(Romance sonámbulo de Federico García Lorca,revira dóu castihan pèr Ive Gourgaud)


Verd coume iéu t’ame verd.
Lou vènt verd.
Li vèrdi branco.
La barco subre la mar,
Lou chivau dins la mountagno.
Emé soun oumbro à la taio
Elo pantaio au bescaume,
Vèrdi li car, verd li péu,
Emé sis iue d’argènt fre.
Verd coume iéu t’ame verd.
Souto la luno bóumiano
Tóuti li causo la vèson
Mai elo li pòu pas vèire.
Verd coume iéu t’ame verd.
D’estelasso gelibrado Vènon emé lou pèis d’oumbro
Que duerb lou camin de l’aubo.
Freto soun vènt la figuiero
À la limo de si branco,
E lou mount, cat soulipaire, Enisso si cabouio agro.
Mai quau vendra ? e de mounte ?
Elo countunio au bescaume,
Vèrdi li car, verd li péu,
Pantaiant la mar amaro. - Coumpaire, vole escambia
Moun chivau pèr voste oustau,
Mounturo contro mirau,
Moun coutèu pèr vosto jargo.
Coumpaire, vène saunous
Despièi li còu de Cabra. - Se iéu pouguèsse, jouvènt,
Aquest pache se farié.
Mai iéu deja siéu pas iéu,
Ni moun oustau l’oustau miéu. - Coumpaire, vole mouri
Ounestamen dins moun lié.
D’acié, fuguèsse poussible,
Emé de linçòu de lin.
Noun veses que siéu nafra
Dóu pitre fin-qu’à la gorjo ? - I’a tres cènt roso moureto
Que porto toun courset blanc.
Toun sang degouto e s’eisalo
À l’entour de la taiolo.
Mai iéu deja siéu pas iéu,
Ni moun oustau l’oustau miéu.. - Au mens leissas-me pouja
Enjusquo lis aut bescaume,
Leissas-me pouja ! leissas-me Enjusquo li verd bescaume.
Li barando de la luno
Pèr ounte retoumbo l’aigo.
Ja poujon li dous coumpaire
Enjusquo lis aut bescaume.
Leissant de marco saunouso,
Leissant de marco plourouso.
Brandavon sus li téulisso
Li calèu de ferre-blanc.
Milo tambour de cristau
Nafravon la matinado.
Verd coume iéu t’ame verd,
Lou vènt verd, li vèrdi branco.
Li dous coumpaire poujèron.
Lou vènt duradis leissavo
À la bouco tasto fèro
De fèu, mento e baseli. - Coumpaire, digo, ounte es,
Ounte es ta jouvènto amaro ? - Quant de cop t’a espera !
Quant de cop t’avié’spera,
Caro fresco, négri péu,
Dins aqueste verd bescaume !
Sus la bouco di cisterno
Se bressavo la bóumiano.
Vèrdi li car, verd li péu,
Emé sis iue d’argènt fre.
I’a un geleiroun de luno
Que la soustèn subre l’aigo.
La niue se faguè entimo
Coume, dirias, un planet.
De gardo-civil bèn èbri
À la porto bacelavon.
Verd coume iéu t’ame verd.
Lou vènt verd.
Li vèrdi branco.
La barco subre la mar,
Lou chivau dins la mountagno.

(Reviraduro inedicho facho à Brasilia lou 19 de setèmbre de 2003)