Nosto-Damo de Peipiolo
« En foro de la Crau se n’es gaire parla… »
Poudèn dire parié de Nosto-Damo de Peipiolo : en foro dóu Var, se n’es gaire parla !
E pamens ! Es à Sièis-Four (à mié-camin de la Sagno) qu’avèn la capello paleoucrestiano la mai vièio d’Europo… La coulegialo Sant Pèire e Nosto-Damo dóu Mai ié raubon la noutourieta. Avans elo, encaro, i’avié deja aqui un culte pagan qu’an retrouba uno pèiro à tres coufèu cava pèr l’ome e utilisa au tèms di Ligure pèr li sacrifice.
Dins un païsage requist, au mitan dis óulivié, dis auciprès, di pin e di vigno, aquelo capello vous aculis au bout de soun caminet calada entre li restanco. Capello de la pountanado caroulengiano, dato dóu siècle VIen e meme de la fin dóu siècle Ven e gardo la memòri de l’ancian priéurat de Sancta Maria de Sexti Furno (Sièis-Fours) que toumbè dins lou bèn de l’abadié Sant Vitour de Marsiho au siècle XIen.
Lou siècle VI es lou tèms d’un proumié age de l’art rouman en Prouvènço e N. D. de Peipiolo n’es lou tipe : uno glèiso coume uno nau revirado e sa croto. La vouto es à plen cintre e li pèiro jauno, roso o griso, bèn ajustado mai pas aliscado. Uno architèituro un pau coume se troubavo à Chipre o en Sirìo au tèms que Sant Cassian venguè à Marsiho pèr founda Sant Vitour (414). Vai ansin qu’avèn vuei, souto un clouquié-campanile, tres nau e tres absido virado levant-pounènt que daton di caroulengian, provo facho emé la descuberto de dès-e-vue toumbo emé si terraio, souto li paret dóu deforo.
Au siècle XI, quouro vitourino, la capello fuguè alargado e restaurado. Pièi au siècle XII apoundeguèron lou pourtau, la vouto à double-cabrioun, la nau dóu nord e lis arc de pèiro bluio.
Un pau à l’abandoun, fuguè restaurado en plen, en 1959, souto l’aflat dóu paire Charlier (1911-1976), un beneditin, que se vèi sa toumbo sus lou relarg de la capello. Fuguè marcado i Mounumen Istouri en 1967 bonodi lou sabé e lou biais dóu Paire Charlier que sachè tout adouba sènso rèn degaia.
Dedins, uno bello estatuo de la Vierge à l’enfant dóu siècle XVI, estatuo de bos de sourbié que ié rèsto de marco de pinturo anciano. Fai si 1,40 m d’aut. Avié dispareigu à la Revoulucioun mai es uno famiho de l’endré que l’avié recado en grand secrèt e la rendeguè en 1959, quouro la capello fuguè restaurado…
Quouro rintras, de nouvèu veiriau vous prenon pèr l’iue que soun fa de cuòu de boutiho de coulour. Lou paire Charlier avié assaja de lis encerta dins lis anciàni duberturo di paret. Segound lis ouro e la lumiero, fasien un efèt di mai agradiéu e lou paire decidè de li leissa. Se faguè ansin mèstre veirié !
E aquéu noum de Peipiolo ? De mounte vèn ?
Lou proumié doucumen que la capello i’es marcado dato de 1268 e se capito dins lis estat de la catedralo de Touloun. Se ié pòu legi : SANCTA DOMNA DE PIEPOLOS.
M’an dis que ié trouban :
- lou latin PIE, un averbe liga i sentimen pious, religious, à l’afecioun, à la tendresso o counforme i sentimen naturau.
- lou latin POLUS o lou grè POLOS que vòu dire lou pole, l’estello poulàri, lou cèu.
Noste Peipiolo sarié dounc belèu un pole, un grand cèntre religious, uno estello que menavo lou mounde ? Quau nous dira lou sèns eisat.
Vuei, es duberto cade tantoustado e se pau demanda de vesito guidado.*
Lou 29 de setèmbre, pèr la Sant-Miquéu, es grand fèsto à Nosto Damo de Peipiolo.
Peireto Berengier
* La Fraternité 04 94 63 38 29 vo Paire Hubert 06 13 92 48 23. Cade dimenche, uno messo à 9 ½ ouro
.
Aucun commentaire:
Enregistrer un commentaire