J-H Fabre : Lou Ventour - le Ventoux - 1891

.

Lou Ventour


L’ivèr fini, quand lou vanèu
Is alo loungarudo passo,
Eilamoundaut, sus l’esquinasso
Dóu Ventour se foundon li nèu;
A l’alen dóu marin, la reialo flassado
D`eici, d eila, se rout e pendoulo estrassado.

As dounc pas vergougno, o gigant,
De tis espalo de lausiho
Quand lou soulèu li desabiho;
As pas vergougno en replegant,
Pèr faire vèire tout, li pan de ta camiso
Qu’empesavon de gèu li boufet de la biso ?

Agouloupa dins un mantèu
Blanc coume vèntre de couloumbo,
Que te descendié dins li coumbo
Jusqu’i boudougno di boutèu,
Fasiés rèn vèire, rèn que la taco negrasso
De ti bos de faiard bulassa pèr l’aurasso.

Eres superbe, enmantela
D’uno limousino ufanouso,
Alor que la roupo nevouso
Amagavo toun su pela,
E dins si ple d’argènt tapavo is iue toun rable
Rougnous, enroucassi, fendescla, miserable.

Eres un rèi glourious alor
Que sus lou satin de ta raubo
Gisclavon lou rose de l’aubo
Pièi dóu tremount la braso e l’or;
Ères lou gigantas vesti de mousselino,
Emé de nivo blanc de-fes pèr capelino.

Ges de nèu. Ti bos souloumbrous,
Entre li roucas e li lauso,
Soun aro, o tristesso di causo!
Un maigre bouquet de péu rous
Au crus esgarussi de ta fèro peitrino
Ounte lou loup varaio en liogo de vermino.

Eres un rèi; siés aro un gus,
Un panouchous à braio routo
Que vai barrulant sus li routo
Li pèd descaus, lou pitre nus,
E que, pèr acata la misèri dis anco.
Met négri petassoun à si gueniho blanco.

Serignan,
16 mai 1891

.