samedi 28 avril 2012

S A Peyre : L'ENFANT JOGO EME LIS ESTELLO... & LOU JARDIN... - poésies

.




L'ENFANT JOGO
EME LIS ESTELLO...


L'enfant jogo emé lis estello
Dins lou grand relarg de la niue;
Lou cèu es uno canestello
De flour, qu'envèsso sus li piue.

L'enfant escouto sout lis aubre
Li roussignòu e li grihet,
E s'estouno davans li maubre
Que soun nus e soun famihié.

L'enfant se trobo, dins l'abounde
De l'amplitudo e di sesoun.
L'enfant recoumenço lou mounde,
'Mé li miracle e la resoun.




*+*+*+*



LOU JARDIN...


Lou jardin de l'enfanço es un jardin sauvage
De mióugrano esclatado e de chartrouso en flour.
S'après mié-siècle ié fasiéu un roumavage,
Ié troubariéu plus rèn qu'un estras de labour.

L'aigo, pèr un rigòu, ié venié de la servo;
I'avié de roussignòu perdu dins li ciprès,
D'abiho, de tavan, un pous, de vièii gerlo,
E moun estounamen. Li destrùssi l'an pres.

Lou jardin de l'enfanço es uno mescladisso
De dos orto qu'aviéu à moun coumençamen;
L'autro dins l'abandoun enca s'emparadiso,
Uno morto belèu ié trèvo tendramen;

Dins aquelo un lausié sus lou pous oumbrejavo,
— Mai sabiéu rèn alor di nerto, di lausié.
L'an cremavo en avoust e pièi se refrejavo.
Moun silènci d'enfant, i'avié res que l'ausié.



.

Aucun commentaire: