LIS ELEICIOUN
Lis eleicioun, aquéli famousis eleicioun que fan mascara tant de papié, que fan gausi tant de paraulo, e bouton espaso e coutèu de gènt que sarien urous de viéure bons ami, lis eleicioun an tambèn soun coustat coumique.
A Sant Brancai dis Ase, i'a uno bono pasto d'ome, un pau simplas, es verai, que vòu, coste que coste, èstre maire de sa coumuno. A tóuti lis eleicioun, Jan Balourdo, un noum chausi, se fai pourta sus quauco listo. Aquest an, Jan Balourdo èro mai candidat.
Lou jour dis eleicioun, noste paure ome s’atrouvè malaut e, pamens, vouguè faire soun devé. De bri o de bro se trinassè enjusqu’à la coumuno, voutè e tournè se jaire.
Eiça vers li dès ouro, uno bando de galapian venguèron tabasa à la porto de Balourdo en cridant:
—Jan! aquest cop lou sias! es vous qu'avès lou mai de voues, fau que sieguès lou maire! Vivo moussu lou maire!
Dóu cop, Jan fuguè gari. Dins dos segoundo, èro à la porto, e fasié intra la bando. Catarino, sa femo, èro folo de jòio. Zóu! de got, zóu! de vin blanc, d'aigarden e de vin kiue. Li droulas, beguèron coume de trau e s'anèron jaire emé sa miejo gueto en cridant coume de fòu:
— Vivo moussu lou maire!
Lou lendeman de matin, quand Balourdo agantè lou Pichot Marsihés pèr vèire lou resultat dis eleicioun, lou journau ié toumbè di man: lou paure omo avié agu….. uno voues, la siéuno!
Lou JACOUMAR
.
Aucun commentaire:
Enregistrer un commentaire