Sully-André Peyre : APRÈS DE MILENÀRI...

.

APRÈS DE MILENÀRI...

Après de milenàri dins l'escur,
Uno amo se reviho e se remento,
Oublidado, perdudo, i foundamento
De la vido, de l'obro e dóu malur.

— Quant i'a de jour que ma vido es passado?
Es que la mort a leissa quaucarèn
De moun desir, de si gèst aparènt:
Ma voio lasso e ma joio estrassado?

Di long travai toujour recoumença,
E di grand chaple, e di vèspre tranquile?
I'a-ti plus rèn que se taise o que quile,
I'a-ti plus res? I'a plus que de pensa,

Dins l'estrechun de l'oumbro e de la pèiro,
Presounié de l'eterne, que noun saup
Se l'auro de la mar, pleno de sau,
O se la plueio, e la vitro que guèiro,

Soun encaro un alen, uno tristour,
O se la terro es uno luno morto?
De que s'enauro au rode de la porto,
E de que s'amoulouno? E la mistour

D'aquélis ur de pas e de relèime,
Quouro i'a plus d'espàci ni de tèms,
Quouro la vido à la gràci se tèn,
E que lou cors es uno flour de l'èime.

Es lou desvèi d'un mort incouneigu,
Un sounge dóu noun-rèn, qu'estouno encaro,
Estènt que vuei, liuen de ço que s'encarro,
Uno musico a davala dins tu.

(1947.)


.