J d'Arbaud : La barqueto

.

La Barqueto

La barqueto de gip que veses amoundaut
Ras di poumpo lusènto, en-dessus dóu fougau,
Acò ‘s noste relicle. Es un pau mascarado
Pèr la póusso que toumbo e la grosso estubado,
Li mousco, tout l’estiéu, ié fan nèblo à l’entour.
En venènt d’eiçabas, moun grand l’aduguè ‘n jour
Que l’aigo dóu sant pous i’avié leva li gouto;
A touca li coutret, la mastro emé li bouto,
Li grùpio, dins l’estable, e lou brès dis enfant.
Es à l’ounour de-longo e, pèr Nouvè, chasque an,
En signant la fougasso emé li cagaraulo,
La barqueto dóu grand, la mete sur la taulo.

Res la toco que iéu. Se i’arrivavo mau,
Belèu que la malandro intrarié dins l’oustau.
Lou paure vièi disié: “Li Santo renoumado
“Aparon lou pelot, lou bestiau, I’oustalado,
“Engardon de la fèbre emai dóu marrit tèms.
Vaqui perqué, poudras eici vèire toustèms,
Li Santo, coume à-bas, dins sa capello vièio,
Quihado au bèu mitan de nosto chaminèio;
Vaqui perqué, davans sa barqueto, segound
Lou pres-fa di journado e lou biais di sesoun,
Pos vèire s’espeli, dins la galanto bolo
De flot de saladello e de flour de gacholo;
E regardo: li chato au bèu jour di Rampau,
I’an clavela ‘n dessus, pèr apara l’oustau
Dóu tron, di gròssis aigo e de la secaresso,
Lou ramas d’óulivié qu’an pourta de la messo.

.