vendredi 24 août 2012

Peireto Berengier : Rèino Jano - Roubert Fouque




.





Pèr la Rèino Jano,

pèr Roubert Fouque



1982 – 2012, 30en anniversàri de la « Rèino Jano » de Roubert Fouque, un mouloun d’image me revènon en memòri.

La bello Santo-Estello de Niço, emé lou flame majourau Compan, lou tant brave majourau Gag e tóuti lis ami, vuei dispareigu.

Image de la vièio vilo, image di manifestacioun, image dóu rèire-païs, image mai que mai de la vesprado de la « Rèino Jano ».

Aquelo tragèdi de Frederi Mistral, nous avien toujour di que se poudié pas jouga. Eto, èro belèu dificile mai pas impoussible, dóu mens pèr Roubert Fouque e la troupo de l’Escolo de la Targo.

Me ramente de l’escaufèstre, quand nous anouncièron que la troupo, quàsi tout i’èro esta rauba… E me ramente, quand esperavian, dins lou tiatre, barbelant de saupre coume…

Coume ? Ero mau estima lou talent e la voulounta de Roubert Fouque e de sa jouino troupo de la Targo. Queto souspresso ! De decor à ravi d’Enri Pertus, uno Rèino majestouso dins sa raubo touto simplo, sènso beloio, bord qu’èron estado raubado. Belèu mai majestouso encaro d’aquéu manco, d’aquelo simpleso. L’esmougudo èro grando pèr tóuti, de vèire aquélis atour afeciouna, treboula belèu pèr lou raubadis mai que tenien si mino e jougavon coume se de rèn noun èro. Tóuti au miés de soun talènt, tóuti afeciouna, afouga tant que e courajous.

Me siéu sèmpre demandado se sarié esta autant capita sènso lou rauba. Uno Rèino Jano, vestido de rèino e cuberto de beloio sarié belèu pas estado tant esmouvènto... Quau saup ?

Ço que me marco, vuei, en me ramentant tout acò, es lou manco que nous leissè lou majourau Fouque en s’enanant vers Santo-Repausolo. Segur qu’avèn encaro de troupo de tiatre. Segur que l’Escolo de la Targo countuniè de jouga. Segur tambèn, qu’avèn plus jamai vist de « Rèino Jano » sus li pountin prouvençau. L’avèn revist qu’un cop, après aquelo proumiero, dins la cour de l’evescat d’Arle, la memo annado. Ero bèu, mai la rèino avié retrouba si beloio… mai èro lou segound cop… I’avié plus tant d’esmougudo, dóu mens pèr li qu’èron esta presènt à Niço !

Poudèn qu’espera qu’uno nouvello troupo, tant flamo e tant courajouso, nous tourne baia un espetacle parié, aro que manco plus ges troupo jogo simplamen « Mirèio ».


Peireto Berengier




.

Aucun commentaire: