samedi 18 janvier 2014

R. Martano : PÈIRE PUGET À TOULOUN - 1645-1659 e 1668-1679 (4th Part - final)

(...)


 
Pèr touto óucupacioun Puget se veguè alor coustren à faire l’adournamen dóu canot dóu rèi, un dessin pèr la coustrucioun d’un boulidou pèr l’arsena, coustru en 1669, à coumpausa la poupo dóu Monarque… S’enanè quàuqui mes à Marsiho, souna pèr l’intendènt Arnoul que ié demandavo de dessin de poupo de galèro, tambèn pèr lis escabin que voulien de dessin d’embelimen de la vilo, pièi à Gèno, e s’entournè au mes de juliet 1668 à Touloun acaba lis esculturo dóu veissèu amirau lou Monarque. Lou 28 de mai 1669, lou du de Beaufort, vengu à Touloun surviha l’armamen de la floto, poudié escriéure à Colbert que « Le Monarque a presque toute sa sculpture à sa place et déjà beaucoup de dorure. Il ne fera point de honte au maître à qui il appartient ; celui qui a fait ses ornemens est un nommé Puget qui me paroit un très-habile homme ; s’il avoit eu l’honneur de vous entretenir, vous le trouveriez tel en peinture, sculpture et architecture. Il meritoit, selon le sens de tous ceux qui le voient, d’être à Paris. »


Dins lou meme tèms, se preparavo lou manda d’uno escadro is Indo. « Prenez bien garde que les vaisseaux destinés pour ce voyage, que non-seulement leur bonté, mais mesme leur beauté donne quelque idée de la grandeur du roy dans ces pays-là. », escriguè Colbert à d’Infreville lou 14 de juliet 1669. Apoundeguè un pau plus tard « …] vous m’advouerez vous-même qu’il n’y a rien qui frappe tant les yeux ny quy marque tant la magnificence du roy que de les bien orner comme les plus beaux qui ayent encore paru à la mer, et qu’il est de sa gloire de surpasser en ce point les autres nations. »
Puget fuguè encarga de l’Ile-de-France e dóu Paris, mai acò èro pas proun pèr éu, e faguè li dessin di veissèu qu’èron en trin d’èstre assembla, acabè la coustrucioun dóu boulidou, dreissè de plan pèr la muraio de l’encencho du cap Cepet e pèr l’agrandimen de l’arsena de Touloun (n’en fara quatre, que saran pas aceta, car trop carivènd). Aquest arsena qu’èro un brusc ounte cadun s’apetegavo, e que Puget e La Rose voulien diregi, contro la voulounta d’un Turreau mai que tout carcagnaire e empuro-gavèu.
Dins la memo annado, Colbert mandè à Touloun lou coumissàri generau di fourtificacioun que duvié s’óucupa de l’agrandimen dóu port, lou chivalié de Clerville. Autant lèu la castagno tubè entre éu e Puget. Clerville s’encagnavo contro l’ounnipoutènci de Puget e s’achinissié à desfaire, destruire, despresa touto son obro. « Il ne veut pas qu’il reste rien à l’arsenal que ce qu’il propose », dis Leon Lagrange. Si plan e aquéli de Puget fuguèron manda à Colbert pèr eisamen.
Pamens li garrouio emé Clerville e lou manco de counsideracioun que ié pourtavo Colbert fasien que maucoura Puget, qu’un cop de mai s’enanè dins sa vilo-refuge, soun estaco, Gèno. Sian à la fin de l’annado 1669. Soun absènci durara sièis mes, que Rombaud Longueneux e Turreau n’en aprouficharan pèr coumença de travaia li poupo de quàuqui veissèu nòu. Mai quouro Puget tournè à Touloun au mes de jun 1670, d’Infreville i’èro plus, e soun ramplaçant, Louis Matharel, lou couneissié pas. E Puget prenguè la grosso coulèro en vesènt que Longueneux e Turreau avien travaia sènso éu, e se meteguè dins la tèsto de faire destruire l’obro di dous ome… Voulié diregi l’esculturo, e prendre la direicioun di coustrucioun. Ansin s’enemiguè emé lis escultour, lis engeniaire, li fustié. Enfourma d’aquelo situacioun, Colbert respondeguè que pèr la coustrucioun di veissèu « ledit Puget ne doit pas en prendre la direction, c’est à luy à s’assujettir pour la sculpture à ce qui sera résolu par les officiers et les charpentiers du port, et s’il se met de pareilles chimères dans l’esprit, il faudra bientôt le remercier… ». Puget fuguè malamen nafra pèr aquelo responso. Segur, avié passa l’osco, mai es-ti que Colbert couneissié lis obro que l’artisto avié coumplido en deforo de l’arsena de Touloun ? D’ùnis istourian, dis Leon Lagrange, an pensa que Colbert secutavo Puget pèr-ço-qu’èro esta lou prouteiciouna de Fouquet. Es verai que lou menistre de la Marino s’èro de-longo achini à-n-aprouficha lis óucasioun de ié pourta tort. Pamens Matharel èro de soun coustat e escriguè à Colbert que Puget avié «le génie fort beau, et très-propre à servir en ce port pour les choses auxquelles il est destiné, c’est-à-dire aux dessins et ouvrages de sculpture en quoy il excelle ; il prétend aussy estre sçavant en l’architecture de terre et de mer et il parle assez bien de l’une et de l’autre. Il a conduit icy un pavillon qui sert à l’estuve, lequel est fort bien basti mais fort mal placé… ». Aquéu pavaioun que Clerville voulié faire demouli, e que sara destru pèr un incèndi en 1677.
Venguè pièi lou moumen que lou coumandant de la floto d’Alméras, se plagneguè dóu pes di poupo di veissèu trop escultado e ournado, ço que rendié la navigacioun  e li coumbat dificilo. Un cop de mai, Colbert de s’en prendre à Puget e de ié demanda d’aléuja si dessin, ço que, segound d’Alméras, l’artisto refusè de faire. Mai ié fuguè pamens coustren. Li veissèu adourna estènt plus d’atualita, seguissènt en acò la modo angleso, Puget se retroubè sènso trop d’ativeta. Se virè dounc vers l’esculturo qu’èro ço qu’amavo lou miés de faire.
Pèr cop d’astre, avié trouba sus lou port dous queiroun de mabre de Carrare, sènso destinacioun preciso, e s’empreissè de demanda à Colbert l’autourisacioun de lis esculta. Aura la responso lou 26 de desèmbre 1670 : Colbert dounavo soun acord, mai falié avans ié manda li dessin. Li dous queiroun devendran lou Milon de Crotone (museon dóu Louvre) e Alexandre et Diogène ( museon dóu Louvre).
En 1672, Puget croumpè à Touloun un oustau dins la carriero de Bourbon (atualo carriero de la Republico) que regardavo la mar, e que sara destru dins li boumbardamen de Touloun en 1944. Après lou maridage (en 1677) de soun fiéu Francés em’uno damisello Jano Jourdanis qu’avié un bèn à-n-Ouliéulo, fara agrandi aquelo prouprieta pèr ié coustruire uno bastido famihalo.
En 1678, toujour óucupa à l’arsena, coumencè lou group de Persée et Andromède (acaba en 1684), e l’annado seguènto, la coulabouracioun óublijado (e la garrouio) entre Colbert e Puget prenguè fin quand lou menistre ourdounè que Puget fuguèsse raia dis estat dóu persounau de l’arsena. La resoun n’èro si proujèt trop carivènd. Li mabre qu’avié coumença d’esculta fuguèron traspourta à Marsiho. Un cop acaba, lou Milon de Crotone sara mes dins lou jardin de Versaio, à l’intrado de l’alèio reialo. Es vuei au museon dóu Louvre, e lou museon-biblioutèco de Touloun n’en a uno còpi.
En 1679, Pèire Puget quitè Touloun pèr Marsiho.
En 1690, lou counsèu de Vilo de Touloun decidè de basti uno pescarié e demandè à Puget de faire un proujèt. Malaut que malaut, l’artisto faguè lou dessin – paga un louvis d’or –  mai gagnè pas lou marcat. Es Cesar Aguillon que fara lou travai.
Après la mort de sa femo Paulo lou 23 d’avoust 1690, se remaridè lou 26 de mai 1691 emé Magdeleine de Tamburin. Sus lou registre dóu maridage es designa coume ingénieur du Roy.
Lou 2 de desèmbre de 1694, à Marsiho, Puget mourè dins sa bastido de Fontgate qu’avié croumpado en 1668. À l’intrado d’aquelo s’èro fa basti uno capello pèr i’èstre sepeli. Malurousamen fuguè pas prèsto pèr aculi soun cadabre, e soun fiéu Francés lou faguè enterra dins la glèiso dóu couvènt de l’Observance lou jour meme de sa mort.
Lou tèms a passa. Lou couvènt de l’Observance a despareigu emé la toumbo de Puget. Despareigudo tambèn la pichoto capello… Plus rèn que la póusso dis os pèr tout souveni…  Quau pòu dire se, couchado pèr lou vènt, se sarié pas anado mescla is aigo de la Mediterragno pèr retrouva Gèno…

                           
                            Rousselino MARTANO






Pèire PUGET

Lis art de l’engèni latin,
Que sa mestranço es sènso egalo,
Dins soun obro an lou biais divin,
Lou de la raço prouvençalo.

Si pincèu, cisèu, craioun fin,
À Marsiho, en Ais capitalo,
À Touloun, l’arsena marin,
An mes sa marco triounfalo.

Emai Puget èro un cresènt…
Ansin dóu mabre fernissènt
Tenènt la poutesta sereno,

Faguè sa deviso d’elèi
D’aquesto soubeirano lèi
De Diéu : « Ges de bèn sènso peno ».

 
Lou majourau, Baroun Guillibert
Pèr la felibrejado long la mar de Touloun i Sableto
Setèmbre 1907. - (Armana prouvençau 1908)





*+*+*+*


Aucun commentaire: