lundi 6 janvier 2014

R. Martano : PÈIRE PUGET À TOULOUN - 1645-1659 e 1668-1679 (1st Part)



PÈIRE PUGET À TOULOUN

1645-1659 e 1668-1679

*+*

« Si tu veux me parler d’un Provençal, parle-moi de Puget. En voilà un qui sent l’ail, et Marseille, et Toulon, même à Versailles, sous le soleil de cuivre de Louis XIV. Il y a du mistral dans Puget, c’est lui qui agite le marbre. »1


Lou noum d’aquéu que fasié tremoula lou mabre es, pèr lei Toulounen, liga à-n-uno plaço au cor de la vièio vilo, e is Atlante - souvènt apela improupramen Cariatido2 - que suporton lou bescaume de l’annèisse de l’oustau de vilo (que ié dison tambèn coumuno d’ounour), sus lou carrat dóu port.
Un brèu de biougrafìo – avans de vèire l’artisto à Touloun - pèr ramenta que Pèire Puget es nascu à Marsiho, lou 16 d’óutobre 1620, au numerò 22 de la carriero dóu Puits-du-Denier, dins lou vièi e poupulàri quartié dóu Panié. Soun paire, Simoun Puget, tiravo d’uno famiho de païsan, e fasié lou massoun. Emé sa fremo Margarido Cauvin, abalissien quatre drole (cinq fiho èron morto avans la neissènço de Pèire), quouro un marrit jour de 1622, lou malur venguè  pica à la porto de l’oustalado : Simoun se tuè en toumbant d’un enart. Es lou mai jouine di fraire de Simoun, Jan, que s’óucupara de si nebout. L’einat dis enfant Puget, Jan, nascu en 1611, fara lou massoun coume soun paire, dóu tèms que Gaspard, nascu en 1615, taiara la pèiro e que Pèire travaiara lou bos. Lou cago-nis Cesar qu’avié qu’un mes quand soun paire mouriguè, ié subre-viéura pas  mai de sièis annado.
Lou Panié èro un vièi quartié di carriero sourno, estrecho, sènso ges d’ourizoun, e lou drouloun, tre que poudié, de courre dins lou relarg dis Acoulo d’ounte vesié la mar. Lou port de Marsiho èro clafi de galèro vengudo de Touscano, e d’aquéu ribeirés Pèire assistara un jour à-n-un defila de veissèu e de galèro que si poupo ufanousamen escultado e adournado ié faran lingueto. Sa voucacioun neissira aqui…
Quouro Pèire aguè si quatorge an, l’ouncle Jan lou meteguè en aprendissage à Marsiho, encò dóu mèstre Jan Roman, menusié e escultour sus bos, que travaiavo tèms en tèms pèr l’arsena di galèro. Es aqui qu’aprendra li rudimen dóu mestié. Mai au bout de quatre an, pousquè plus rèn aprendre de soun mèstre, e se decidè, à la fin de 1638, de lou quita e d’ana à Flourènço pèr coumpleta sa fourmacioun d’escultour sus bos. Pèr cop d’astre, fuguè remarca pèr lou mèstre escultour dóu grand du de Flourènço Ferdinand II de Medicis, que l’engagè pèr travaia dins lis ataié de la marino touscano, la proumiero de la Mediterragno, e que n’avié vist si galèro ufanousamen escultado dins lou port de Marsiho.
En 1639, calourentamen recoumanda pèr soun patroun flourentin auprès d’un escultour sus bos ami de Pietro Berrettini, miés couneigu souto lou noum de Pietro da Cortona, Puget partiguè à Roumo pèr se presenta davans lou celèbre architèite e pintre que travaiavo au plafoun dóu Grand Salon dóu palais Barberini. D’abord mesfisènt, lou mèstre lou prenguè dins sa chourmo d’oubrié après agué vist ço qu’èro capable de faire. En 1640, Puget lou seguiguè à Flourènço mounte fasié la decouracioun interiouro dóu palais Pitti. Es d’aquélis annado italiano que daton si proumiéris esperiènci de pinturo,  guida pèr lou Flourentin.
À la fin de 1643, o à la debuto de 1644, Puget rintrè à Marsiho, que sa maire malautejavo, e mau-grat li proutestacioun dóu mèstre que ié prepausè meme de ié marida sa fiho !

Proumié sejour à Touloun –  1645-1659
À Marsiho, tout englouria de ço qu’avié vist à Flourènço e à Roumo, lou jouine artisto fuguè forço remarca. Talamen tant que d’óuficié di veissèu dóu rèi fuguèron sedu pèr soun travai. Tourna à Touloun, diguèron tout lou bèn que pensavon de Puget à l’amirau de la floto, lou du de Maillé-Brézé que, tout-d’uno, counvouquè lou jouine ome. L’amirau fuguè entousiasma pèr lis esquisso e li croucadis que Puget avié fa pèr de galèro touscano, e ié demandè de travaia pèr l’ataié d’esculturo sus bos de Micoulau Levray à l’arsena de Touloun. En 1645, Micoulau Levray decourè lou navire lou Magnifique d’après li dessin de Puget. En 1646, après la mort de l’amirau de Maillé-Brézé, lou navire fuguè rebatisa la Reine en l’ounour d’Ano d’Autricho, devengudo regènto dóu reiaume en 1643.
Puget quitè pièi l’arsena pèr entre-prendre un viage en Itàli em’ un religious, lou fraire Jóusè, manda pèr la rèino-maire en visto de dessina li mounumen e lis estatuo antico. La mort brutalo dóu paire dins lis aigo dóu Tibre ramenè Puget à Touloun, e aquéu reprenguè soun travai à l’arsena. Se maridè en juliet 1647 emé Paulo Boulet. Un fiéu, Francés, neissira d’aquelo unioun lou 17 de desèmbre 1651 à Touloun.
Malurousamen, la Foundo qu’espetè en 1648, ralentira lis ativeta de l’arsena, e i’aura pas gaire de travai pèr lis oubrié. S’estènt acampa quauco reputacioun, Puget pintara alor pèr viéure, en esperant mies, de pichot tablèu pèr lis amatour, d’esculturo de terro cuecho, e se counsacrara pièi à la pinturo religiouso pèr la chabi i counfrarié, i couvènt, is amatour toulounen e marsihés…
Es ansin qu’au mes de setèmbre de 1649, escultè un sant Lazàri pèr la font epounimo, e « la figuro d’un saint Louys, pierre de callisaine, avec la couronne, le sceptre à la main, avec tous les ornements royeaux bien et deubement travaillés »3 pèr èstre plaçado au dessus de la conco de la font de la Pescarié. Aquelo font èro uno coumando de la Vilo de Touloun à M. Levray e à G. Puget. Mai aquéu d’aqui èro pas un abile escultour, e demandè à soun fraire Pèire de faire lou travai à sa plaço. Li font Sant-Lazàri e de la Pescarié an vuei despareigu.
En 1649, ié fan coumando pèr la glèiso parrouquialo Sant-Jan de La Valeto d’un tablèu pèr lou retable de la capello de la counfrarié de Sant-Jóusè, la Mort de Saint Joseph, pagado 80 liéuro. Sara vist, descara, en 1871, pèr Óutave Teissier. Es vuei introuvable.4
Á la debuto de 1650, lou reitour de la counfrarié Notre Seigneur Jesus Christ de l’Esglise cathedralle dudit Tollon paguè 236 liéuro 10 sòu au maistre paintre de ceste ville de Tollon pèr un travai d’iscripcioun, la daururo dóu cadre d’un tablèu e quàuqui retoco sus lou retable de la capello de la counfrarié, sènso óublida quàuqui fournituro. Es un moudèste travai que semblavo lou de decouracioun di veissèu de l’arsena.
En 1651, Puget pintè pèr li capouchin de Touloun l’Apparition de la Vierge au bienheureux Félix de Cantalice, e Saint Félix étendu sur une bière (despareigu). L’Apparition de la Vierge fuguè traspourta dins la catedralo dóu tèms de la Revoulucioun, e classa mounumen istouri lou 17 de mars de 1908.5 Es acrouca vuei à la paret de la capello Santo-Ano. Toujour dins la memo annado, pintè pèr li douminican uno Annonciation, counservado enjusqu’à vuei dins la capello de la Vierge de la catedralo, mai talamen degaiado en 1815 (sourço de la catedralo de Touloun) o 1830 (pèr d’àutri sourço) pèr lou pincèu de Simonet, que se vèi plus aro lou gàubi de Puget.



L'Apparition de la Vierge au bienheureux Félix de Cantalice


En 1654, lou priour de La Valeto ié coumandè, pèr la soumo de 200 liéuro, quatre pinturo pèr metre dins lou retable dóu mèstre-autar de la glèiso Sant-Jan. […]  messire Jean de Gaultier, prieur et seigneur temporel et spirituel du lieu de La Valette, estant à présent en ceste ville de Tollon, de son gré a bailhé a marché au sieur Pierre Puget du dict Tollon, présent, stipulant, de lui faire bien et deubment, sans défault, ni manquement, un pourtraict et tableau pour le maistre autel de l’église parrochiale du dit Valette, de la hauteur de douze pans et de huit et demi de large, représentant un saint Jean, au bas du tableau, aussi grand que nature, avec sa marque, quy est un aigle, accompagné d’un beau païzage aprochant à l’histoire du subjet, et, au hault du tableau y sera représenté une vierge dans une gloire, accompagnée sellon quy sera descript à l’histoire, lorsqu’iceluy saint Jean estoit à l’isle de Palme escrivant l’apocallipse. Encores y sera fait deux tableaux séparés, pour loger dans les niches des collonnes, de la haulteur et largeur du plat-fond des dites niches, représentant l’un saint Joseph et l’autre saint Anthoine, avec leurs marques, et sera fait autre tableau au hault du dit maistre-autel, représentant Dieu le Père et au plat-fond qui est dans le couronnement.6
Quouro Óutavo Teissier, courrespoundènt de l’Estrucioun publico pèr lis obro istourico, e archivisto à Touloun troubè en 1871, encò d’un noutàri toulounen, lou countrat passa entre lou priour de La Valeto e Pèire Puget, se despachè d’ana vèire se l’obro dóu pintre èro toujour pendoulado sus li paret de la glèiso. Ai ! las,  ges d’obro de Puget, à despart lou Sant Jan escrivènt l’Apoucalùssi, que semblavo courrespoundre pau o proun à la descripcioun dounado dins lou countrat signa en 1654. Courrespoundre pau o proun, pèr-ço-que l’aiglo dóu tablèu óuriginau èro estado ramplaçado pèr uno oulasso qu’à soun quiéu brulavo un fiò d’infèr, e pèr-ço-que « les draperies et les fins détails des carnations (ont) disparu pour faire place à des plis en corde et à des chairs en baudruche. […] Ce tableau peut donc être considéré par induction bien corroborée, comme étant véritablement celui que Puget a dû faire, mais cependant à jamais perdu sous les repeints émaillés par le temps. »7 Uno proumiero restauracioun en 1723 pèr lou pintre Volaire e uno segoundo en 1738 pèr Dubosc en seguido de degoutiero avien leissa lou tablèu coume à l’óurigino, mai uno tresenco en 1815 pèr Simonet – qu’avié tambèn eiserça soun coupable « talènt » sus l’Annonciation – lou trasfourmara coumpletamen, fasènt dóu Sant Jan escrivènt l’Apoucalùssi à Patmos un Sant Jan à la Porto latino, après agué escafa l’aiglo dóu pres-fa pèr pinta à sa plaço l’oulo dóu suplice. La dato d’aquelo « restauracioun » douno belèu l’esplico d’aquelo desgradacioun, que l’aiglo, emblèmo sedicious ramentant Napouleoun Ié, fuguè enebido après sa casudo, e la representacioun de l’aiglo fuguè sacrificado sus l’autar de la poulitico. Lou tablèu es toujour en plaço dins la glèiso, mai bèn evidentamen l’estile de Puget a despareigu. Dins la listo dis obro de Pèire Puget, Marìo-Crestino Gloton8 classo lou tablèu dins lis obro « documentées mais défigurées ».
Mai mounte an passa Sant Jóusè, Sant Antòni e Diéu lou Paire ? Diéu soulet lou saup !
En 1656, Puget pintè un autre tablèu pèr La Valeto « à l’honneur et louange de Saint Armentayre ». Teissier l’a pas vist en 1871.
De que soun devengu aquéli tablèu ? Lis istourian soun pas d’acord sus lis esplicacioun poussiblo. An-ti tóuti crema dóu tèms de la Revoulucioun ? Pamens d’àutri tablèu que soun pas de Puget, éli tambèn d’ispiracioun religiouso, soun toujour acrouca i paret de la glèiso quouro Teissier la vesito.
Resten à La Valeto ounte se pauso lou proublèmo de l’imposto en bos esculta de la porto d’intrado de la glèiso. D’ùni, tau Pèire Bel, istourian de la Valeto, an vougu ié vèire lou travai de Puget, que represènto Sant Jan escrivènt l’Apoucalùssi dins l’isclo de Patmos. Li detai d’aquelo esculturo s’endevènon emé ço qu’èro esta demanda à Puget pèr lou priour Gautier pèr pinta lou tablèu de Sant Jan9. Laurèns Germain dis, éu, que l’imposto sarié l’obro, pèr lou dessin, d’un elèvo de Puget, Glàudi Dubreuil10 e de Louis Imbert pèr l’eisecucioun.
À parti d’aqui, Puget laisso la pinturo pèr se counsacra à l’esculturo e à l’architeituro.
*+*+*

Aucun commentaire: