samedi 4 janvier 2014

Peireto Berengier : L’academician e lou generau - « L’académicien et le général, Lettres présentées et annotées par Bernard Ardura »


 
L’academician e lou generau


Sabèn tóuti coume Marcèu Pagnol es liga à-n-Anfos Daudet e dounc à nosto abadié ferigoulenco emé lou filme dóu curat de Cucugnan. Ço que sabèn mens o qu’avèn belèu óublida es que lou filme fuguè tourna à l’abadié memo e pèr acò Marcèu Pagnol avié degu rescountra lou paire abat de l’epoco.
 
Aquéu paire abat que tant marquè li fidèu de Sant-Miquèu de Ferigoulet, entre 1946 e 1962, èro mounsegne Nourbert Calmels (1908-1985), óuriginàri dóu Rouergue e fidèu à si racino que devié pièi parti pèr Roumo coume abat generau de l’ordre de Premontré avans que lou noumèsson cardinau. Lou rescontre capitè tout d’uno e uno bello amista coumencè.
Vuei, lou paire Bernat Ardura, de la memo abadié mai au Vatican despièi 26 an e que presido lou Comité pontifical des sciences historiques, nous fai un bèu presènt en publicant la courrespoundènci de Marcèu Pagnol e de mounsegne Calmels. Èro bèn plaça pèr retrouba aquesto courrespoundènci recatado pèr la maje part dins lis archiéu dóu Vatican. La publiquè en 2011, à l’óucasioun dóu 25en anniversàri de la mort de Marcèu Pagnol.
 
L’oubrage se duerb pèr uno presentacioun saberudo, claro e requisto di dous persounage. Tant Marcèu Pagnol, l’academician, coume Nourbert Calmels, lou generau, ié soun vivènt, afouga e vertadié.
 
Aquesto courrespoundènci d’uno sieissanteno de letro enflamado s’esperlongo de 1954 à 1974 emé la mort de Marcèu Pagnol. En legissènt aquéli letro sian esmougu de vèire coume un laï afourti e un ome de Glèiso se podon liga e presa. Ié vesèn meme uno evoulucioun dins l’èime de Marcèu Pagnol e subre-tout sian pivela pèr l’umour di dous ome, umour tout en finesso. Li letro de mounsegne Calmels sènton la ferigoulo de soun abadié que regretavo tant e que cade oubrage de soun ami n’i’en baiavo un pau mai la noustalgìo… I’emplegavo voulountié li mot de nosto lengo, li mot dóu Rouergue.
 
Un oubrage de 165 pajo que me ramentè coume cade an, pèr li fèsto de la jouinesso, emé mi gènt se retroubavian dins la Mountagneto e coume mounsegne Calmels aculissié cadun coume se fuguèsse unen. Se coumpren bèn qu’emé Marcèu Pagnol li liame se siguèsson nousa tant lèu e tant sarra.
 
Un libre que vau tant pèr la courrespoundènci que pèr la presentacioun di dous ome pèr lou paire Bernat Ardura, noste nouvèu sòci dóu Felibrige.
 

Peireto Berengier

« L’académicien et le général, Lettres présentées et annotées par Bernard Ardura » edicioun Desclée de Brouwer.

Aucun commentaire: