dimanche 30 décembre 2012

Peireto Berengier : Marsiho - La saga dóu saboun

.


La saga dóu saboun




Leva d’un article d’Enri Aubert dins « La Gazette »
n°73 dóu Coumitat dóu Vièi Marsiho.





Es pas de vuei que Marsiho es couneigudo dins lou mounde. Tre l’Age-mejan, lou saboun de Marsiho fasié deja soun renoum dins lou mounde entié.
 


L’espelido

La proumiero referènci que poudrié se rapourta à noste saboun, la trouban encò de Pline l’Ancian (23 à 79 ap. J.C.), dins soun « Histoire naturelle », ounte douno la coumpousicioun d’uno pasto facho de cèndre de fau e de sèu de cabro. Acò èro utilisa, dis, pèr li Galés pèr se tegne li péu de rous. Serviguè pièi de baume, de poutingo e fauguè espera l’Age-mejan pèr qu’arribe lou saboun pèr la bugado e la teleto.

Sèmblo que la receto proumiero siegue arribado à Marsiho au retour di Crousado. De roumiéu o de marchand aduguèron d’Alep la fourmulo d’un mescladis de graisso e d’alcali (al-qâli = cèndre) bon pèr l’igieno.

La Prouvènço èro l’endré perfèt pèr sa fabricacioun emé l’òli d’óulivo e de sòudo. Marsiho avié l’òli e la Camargo procho pourgissié la sòudo emé la Salsola soda de si palun. La sau de mar èro tout proche peréu.

En mai d’aquésti proudu de baso, Marsiho avié lou biais pèr entre-prene emé si marchand e sis entre-prenèire que sachèron faire gando pèr aqueste nouvèu proudu forço interessant.

Tre lou siècle XIV (1371), trouban à Marsiho un proumié sabounié : Cresca Davin.

Au siècle XV e mai encaro au siècle XVI, la fabricacioun dóu saboun, d’artisanalo qu’èro devenguè industrialo.

En 1577, Jorge Bronnenmayer s’istalè à Marsiho e prenguè pèr noum Prunemoyr. Marrida emé la neboudo d’un counsié au Parlamen e souto l’aflat dóu Gouvernour de Prouvènço, mountè uno grando sabounarié. Emé d’oubrié estrangié prouduguè uno meiouro qualiita e en 1579, daverè lou privilège dóu rèi de fabrica un « saboun de Paris »… Emé 360 touno/an inoundè lèu tout lou marcat prouvençau e n’en mandavo vers Rouen, l’Anglo-terro e lou Levant. Mai anè trop vite. Si banquié lou larguèronn e en 1585 barrè si porto. D’àutris usino se mountèron en Avignoun, à Tunis e en Touscano. Pamens, sa bello aventuro dins uno industrìo espourtatriço nous baiè un grand renoum que duro encaro.

Au siècle XVII, lou saboun de Marsiho prenguè sa grosso renoumado que la perdeguè plus. Colbert, menistre di fort quand falié reglamenta l’ecounoumìo dóu reiaume, veguè tout l’interès de noste saboun e ço que ié poudrié gagna. En 1698, apliquè au saboun de Marsiho un de sis edit que n’en reglamentè pèr long-tèms la fabricacioun : utilisacioun d’òli d’óulivo sènso ges de gras d’animau, plus de prouducioun quand fai caud l’estiéu, qu’acò es marrit pèr la counservacioun.


La fabricacioun

Fau 14 jour pèr faire noste saboun. L’òli emplega es tira di grignoun, es-à-dire de ço que rèsto de la proumiero pressioun à fre. Après quàuquis assai la proupourcioun d’òli uguè fissado à 72%.

En mai de la sau, fau apoundre 18% d’umide e subre-tout un saupre-faire que se meiourè long dóu tèms, trasmés pèr lou « mèstre de fiò » de generacioun en generacioun.

L’òli vegetau es mescla à la sòudo dins de gros peiròu, lou mescladis es mes à bouli e pèr uno reacioun chimico l’alcali lou trasformo en pasto. La sau lou rènd mai pur. Es l’empastage vo sabounificacioun. Acò duro vuech ouro.

La pasto es alor lavado plusiour cop emé d’aigo-sau pèr elimina lou trop de sòudo. Es lou relargage, uno óuperacioun delicado que se fai quouro la pasto boulis encaro.

Un cop tratado, entre 3 e 10 jour, lou mèstre sabounié verifico la qualita de sa pasto. Coume un grand cousinié que tasto si sauço, éu, tasto sa pasto e se trobo l’equilibre coume fau, la lavo un darrié cop pèr l’aproupri en plen. Es la liquidacioun.

A-n-aquéu moumen, la pasto es quàsi liquido, la fau leissa pausa dous jour, pièi la coula à 60°C, dins de mole de pèiro, li « meso ». Aqui, lou saboun vai seca dous jour au bon de l’aire.

Un cop se, es decoupa en pan de 35 kilò em’ un coutèu à tour, pièi en blo de 2,5 kilò, 1 kilò, 500g vo 400g segound la demando. Li blo soun alor pausa sus de cledo o de canisso. Dous jour plus tard, uno crousto s’es facho que ié podon estampa la marco, siegue à la man siegue sus machino e acò sus li sièis fàci dóu cube.


Un saboun especifi

Lou saboun blanc se fai emé d’òli de paume e de coupra, lou saboun verd emé d’òli d’óulivo (au mens 60%) e d’òli de coupra, lou saboun negre, en ramplaçant la sòudo pèr de poutasso.

Lou saboun de Marsiho es naturau, ecoulougi e bioudegradable, emé plen de vertu pèr l’igieno. Blanc o verd, agrado proun i bugadiero e i mestresso d’oustau pèr lou linge e li maloun. Lis industriau se n’en servon peréu pèr lis indiano, li lano, la bounetarié e la tenchurarié.

Pèr l’igieno dóu cors es ideau, mai que mai pèr li pèu delicado. Es antisepti sus li pichòti plago. Apasimo peréu li cop de soulèu e ajudo sourti li espino d’oursin !

Se n’en metès au founs dóu lié, segur qu’aurés plus de rampo e dins lis armàri fara fugi li arno.

Lou saboun negre, liquide o pastous, sèr subre-tout pèr li maloun à l’oustau e dins lis entre-preso. La Marino naciounalo l’utiliso sus si navire. Pòu escafa d’ùni taco de pinturo, servi pèr refresca lis animau o tuia li pesou de vòsti flour.


L’evoulun

Un proudu parié poudié qu’agué un gros sucès e un raiounamen moundiau.

Es à l’óurigino de noumbre d’escàmbi coumerciau pèr li matèri proumiero e li proudu fini. Fuguè un moutour impourtant dóu desvouloupamen industriau e maritime de Marsiho. L’òli de Prouvènço n’i’avié pas proun, n’en fauguè faire veni d’Africo, fuguè un proumié pas vers la coulounisacioun.

Lis armatour e li marchand fasien pressioun mai li proudutour resistèron pèr manteni la qualita d’óurigino, coume dins l’edit de 1688.

Pamens, de mai en mai l’òli de paume (Elaesis guineensis) faguè soun intrado e tambèn aquelo de coupra (Coco nucifera).

En 1791, lou chimisto Micoulau Leblanc troubè lou biais de faire de carbounate de soudion emé l’aigo de mar.

Fin qu’i darriéris annado dóu siècle XVIII, l’industrìo dóu saboun couneiguè la glòri. Mai de 100 sabounarié, 73 establimen, 331 caudiero à Marsiho e 14 à Seloun. Tout plen d’industrìo i’èron ligado e de milié d’óubrié n’aproufichavon. N’i’avié proun pèr touto la Franço e tambèn pèr l’espourtacioun de pertout.

Au debut dóu siècle XIX, averavo li 180.000 touno avans 1914 mai soulamen 53.000 touno après 1918. La mecanisacioun ajudè lou reviéure. La prouducioun aumentè fin qu’en 1939…
Guerro acabado, espeliguè la machino pèr lava lou linge e li detergènt chimi menèron nosto prouducioun à sa fin.



E aro ?

Avèn couneigu li marco Le Chat, La Tour, Le Naturel, Le Sapin, L’Abat-jour, Le Fer à cheval e bèn d’autre… En 2011, trouban plus que tres sabounarié à Marsiho : Le Sérail, la Savonnerie du Midi e La Licorne. N’i’a encaro dos à Seloun e quàuquis-uno dins li despartamen vesin.

La grando pountanado dóu saboun de Marsiho es acabado, mai coume lou vilage galés lou mai resistènt, Marsiho s’acroco emé forço pèr faire targo à la councurrènci moundialo que prepauso un « saboun de Marsiho » que de l’autre bout dóu mounde !

Malurousamen, li sabounarié marsiheso avien pas « despausa » la marco e tout lou mounde a lou dre de se la prene sènso rèn paga à Marsiho. Es parié coume pèr li coutèu de Laguiolle…

Lou saboun de Marsiho proudu en Prouvènço a pamens si fidèu en Franço e à l’estrangié, fin qu’au Japoun o en Australìo.

Li counsoumatour que soun pas trop nèsci sabon recounèisse lou saboun e Marsiho autenti que i’es marca « Extra pur – 72% d’acides gras ».


Lou mite dóu saboun de Marsiho se vai pas esvali tant lèu !




Peireto Berengier







.





Aucun commentaire: