Ch. Poncy : Lou Broussin

.

Lou Broussin 

Lei felibre sus tout fan de bèllei cansoun
Qu’an souvènt foueço rimo e gaire de resoun,
Sus lou soulèu e sus la luno,
Lei fiheto, lei flous, la mar, l’ivèr, l’estiéu...
Eu, moun paure broussin, degun t’a fa la tiéu,
E pamens, n’en merites uno.
 

———————————————- 

Lei feiniant qu’an d’escut fan fi dóu couissignous;
Dison que pico au nas e qu’es tròup vermignous,
Mai lou peisan , que buscho ferme,
E qu’a besoun d’un pòu si remouta lou couer,
Trovo qu’un bon broussin sara jamai proun fouert,
E que lei verme tuen... lou verme.

L’araire e lou magau li curon l’estouma.
Sus lou cop de miejour rintro au mas, afama,
alor, pèr alesti lei mucle,
Sus sa lesco de pan estènde lou broussin,
Lou manjo em’ un cebau, l’acabo en tres boufin
E dins soun sang abro mai l’uscle.

Quand la fiero d’Ouliéulo au mes d’avous revèn,
Cadun va de broussin faire sa prouvesien
Au bèu païs deis inmourtello.
S’en chabi à bouiòu, à cournudo, à quintau,
E tout bouen meinagié n’en prouvis soun oustau
Pèr au mens jusqu’à Santo-Estello.

E d’espèci, de sau, de vinaigre, de roum,
Arroso soun broussin que cuoi coume un pebroun:
Agues pas pòu que degun boude,
Ni mèstre, ni varlet, qu’ensin lou manjara.
Au mai sera couiènt, au mai sera sarra,
Au mai fara dreissa lou couide.

Car, quouro que l’anès, nuech e jour, dins lei mas,
Dins leis aubergo qu’an pèr ensigno un ramas,
Quand sias las, que la fam v’abrigo
Sus la taulo, à coustat dóu pan blanc e dóu vin,
De-longo trouvarés la jato de broussin,
E ve n’en liparés li brigo. 

 

Ch. Poncy
Touloun, 

1880

.