Enri Vaschalde : VENÈ DEMAN !

.

Un extrait de l'Armagna Cevenou 2011 - produit par notre ami Ive Gourgaud

0+0+0




VENÈ DEMAN !

Dilus passa, venguès me dire
Que voulias, per voste Journal,
Quicom en potouès, per fa rire.
Ma fe, per un pariè traval,
Sus lou moumen vous refusère ;
Après avé sounda, pourtant :
Li tenè doun[c] bièn ? vous diguère,
Co’s entendu ! Venè deman !

Venè deman ! Fino replico
Emplegado per tout poïs !
Dei cobinet à la boutico,
L’om n’entend qu’acò, mous amis !
Voulè d’argen[t], voulè de plaços ?
Avè beson d’un cop de man ?
Qué de mounde de toutos raços
Vous respoundron : Venè deman !

Onton, per fa crousa ma talho,
Me mancavo re qu’un escu[t] ;
Per manleva ‘quelo foutralho,
M’envau tout drei vès lou Moussu.
Noste bourjouès fai la grimaço,
Viro, tussi, freto sei man
E me di, d’un èr bounifaço :
Uèi, puode pas... venè deman !

Regarda-m’ aquel fassiounable,
Tout poumada dei chap ei foun :
Fai uno poussèiro de diable
Dins soun abit de fanfaroun.
Mè quand Forgiè -dès fes per uno-
Li demando cincanto franc,
Lou drole li di : Cacho-pruno !
Uèi, toumbà mau... venè deman !
Escouta-me, jouino filheto :
Se jamai, lou souèr, un garçou
Vous di : Anen à la guingueto,
Parlaren un pau toutes dous,
Sià pas tant simplo de lou creire,
Planta-lou, foutè-me lou camp ;
Disè-li : Ieu, ame de reire,
Mè uèi, bon-souèr ! Venè deman !

L’autre jour, un paure malaute
S’alassè de soun medeci
E se diguè : Fòu que me trate
Chaco jour en beven[t] de vi !
Graço à sa nouvèlo tisano,
Dins uet jours fuguè bièn-pourtant :
Uèi, quand lou doutur li reclamo
D’argen[t], iel di : Venè deman !

Avèn eici fuorço persounos
Que d’ami manlèvoun lou noum :
Vous uèfroun l’or à bèlos soumos,
Surtout quand n’avè pas besoun.
Mè se, dinc un jour de misèro,
Lious anà demanda cinc franc,
Mai d’uno di : Moun chèr, ma chèro,
Uèi, n’ei pas, mè... venè deman !

Veici la grando Cavalcado
Que lous joùnoi gen[t]s d’Oubena
On agu la buono pensado
De faire, per la charita.
Vesè tout aquélous questaire ?
Per lous paures cèrcoun de pan !
Quand vous tendron la man, pechaire,
Lious disia pas : Venè deman !

( Enri Vaschalde de Largentièiro )

0+0+0

(Aqueste pouemo es tira de l'Armagna Cevenou 2011 - per lou croumpa, costo 5 Euro franco per chèque A L'ORDRE DE: Yves Gourgaud, 56 av du 8 mai, 30520 St Martin de Valgalgues)


© Yves Gourgaud

.