mardi 5 mai 2009

Roumié VENTURO : DICHO PÈR LA FESTO DI GARDIAN: Li aubre li mai founs soun li que mounton aut…


Cette phrase très connue de F Mistral : Li aubre li mai founs soun li que mounton aut… fut souvent employée comme valeur d'exemple et comme haut témoignage de la valeur de la tradition garante de l'avenir, Emile Bonnel l'a citée très souvent ...
R. Venture l'a faite sienne en cette année du départ du grand poète.
Volonté, Hasard, Intuition, qui le sait ?
Chacun défend la langue, les langues & ses traditions en voilà un exemple :


DICHO PÈR LA FESTO DI GARDIAN
1é de mai 2009
(davans l’estatuio de Frederi Mistral)

ooOOOoo

Moussu lou Conse d’Arle,
Midamo e Messiés lis Elegi,
Gènto Rèino d’Arle,
Midamo, Messiés

Coume chasco annado, la Confrarié di Gardian de Sant-Jórgi, dins lou trin de sa fèsto, vèn rèndre óumage à Frederi Mistral davans soun estatuio de la plaço dis Ome. Noste roumavage a vuei uno sabour particuliero. Festejan lou centenàri d’aqueste mounumen, auboura en 1909, en mume tèms que lou cent-cinquanten anniversàri de la parucioun de Mirèio. Raport à-n-aquelo estatuio, Moussu lou Maire m’aprèn d’aiours que venié d’èstre classado dins la tiero di Mounumen Istouri, ço que nous fai grand gau …

A quàuqui tèms de soun anniversàri à-n-elo, que se fara en 2012 pèr lou mié-milenàri de sa foundacioun, la Counfrarié di Gardian lou fai d’autant mai voulountié aquest an, proun simboulique de la pountannado que vivèn, ounte la gloubalisacioun e l’unificacioun di biais de viéure fan soun obro…
Es que sian, pau à cha pau, coumpletamen secuta emai escarni pèr quàuqui « decidaire » de ma grand la borgno que, de Brusselo à Paris, voudrien nous impausa de causo que n’en voulèn pas… S’agis, segur, de la famouso « boumbo » qu’un marrit reglamen voudrié faire pourta i cavalié emai is Arleso pèr « resoun de securita » ! Imaginas-vous nòsti gardian coume sarien galant enfarça de la sorto, sènso parla de la Rèino d’Arle e de si Damisello d’Ounour que ié fan coumpagno pèr nòsti fèsto !...
Faudra tambèn teni d’à ment de proujèt legislatiéu avenidou raport i lengo de Franço… Aquéli d’aqui saupran-ti resta respetous de la pluralita di parla d’o e de la digneta de nosto lengo prouvençalo ? Assajaran-ti de nous fourça d’empassa la ragougnasso óucitano que d’ùni que i’a amarien de nous impausa « dis Aup i Pirenèu » ?... L’aveni, soulet, nous lou dira…

O, dins li tèms que sian, sara mestié de resta à l’agachoun tant coume lou fasien nòsti rèire Camarguen, éli que, despièi de siecle, venien se louga sus aquelo plaço, cor de la vido agricolo de Camargo e de Crau, ounte clantissié nosto lengo prouvençalo...

Vaqui perqué, aqueste jour, es emé fierta emai fidelita que venèn nous clina davans la memòri de noste grand Mistral, la Gènto Rèino d’Arle i’adusènt tradiciounalamen un bouquet de saladello. Pèr nautre, es un biais d’afourti bèn fort que li Provençau e li Lengadoucian, li Camarguen, li Craven e lis Arlaten volon riboun ribagno resta ço que soun dins aqueste siecle vint-unen que, coume lou disié Mistral,

Lis aubre li mai founs soun li que mounton aut…

N’en fasèn aqui lou sarramen. Longo-mai restaren digne de nòsti davancié, de-countùnio e de-longo fidèu à sa terro, soun biais de viéure em’à soun èime lou mai founs.

Vivo lou Mèstre Frederi Mistral !
Vivo la Counfrarié di Gardian de Sant-Jórgi !
Vivo Arle !
E Vivo Prouvènço !...

Roumié VENTURO Archivaire de la Counfrarié di Gardian

Aucun commentaire: