BRUMO — BASSO
Le fumarèlh qu'èro nescut
Aro mateich a Mountagut
S'es abaichat debès la Coumo,
Pèich a roudat, blhanc coumo broumo
E cap al Roc s'es arrapat
Tout siau, a palpos, coumo l'gat.
Le fum, de l'aibre s'entourtilho,
Se fa, se desfa, s'espempilho.
Aro besèm pos mès l'abet
Ni le brougal del Caroulet.
Que bol abriga la mountanho?
Despieits, ou dols? Pauro lhuscanho!
A l'amagat, cou bol jouga,
Cou bol causi de s'ennegra?
Gaitats le bous, aro s'abaicho:
Es deja sus l' camp de la Faicho!
Le lhimauc sort su's moudoulous,
Le trebalh ne be falegous,
E l'dalhaire sus la dressièro
Se sèrp pos mès de la coudièro!
Es coumo nèit! E les parrats
Piulon pos mès dessus les blhats!
Le miu cor, siro de tristesso
Se bat pos fort dins la maleso?
Nani, de pats, tout simplhoment,
Ja tournara l'bouludoment!
Pel moument, de la rousalado,
Auseich la grosso goutejado!
Que rajo de tout le felhum
E que retrouneich sus l'embrum
*+*+*
Aucun commentaire:
Enregistrer un commentaire